The New Testament Bible in the Tsou language
Tsou is an indigenous highly divergent ancient Austronesian language spoken at Alishan (mountain) in Taiwan, with no close relatives in the Austronesian family. Due to its aberrant nature, this language presented one of the biggest language learning challenges for me to date. The consonant clusters and glottal stops tends to create a feeling of stuttering through a sentence. Other peculiarities: there are no prepositions, but there are many articles from hypothetical, to hearsay, to clearly visible. All of the moods and auxiliary verbs are the first words in each sentence.
matai fukuin福音
eoskoskopa
'e matai fukuin福音 isi是 eʉsvʉta教 a'to我們:
'o iesu耶穌 kilisto zou是 'o isi teomneni被給 to hamo上帝 ho和 pafeni ta yatatiskova人類 ci leto'usnu拯救.
ieni藉 to iesu耶穌, isi是 peiseafi to hamo上帝 'o ohsila過 yonto出現 noana'o舊 esvʉtʉ約 ho和 teomneni被給 to mao'o'okosi諾 ci e'e言.
'e fukuin福音 eni這.
o'a不 isi是 anovac'o只 faeni給 to /couyutaya/,
isi是 yaeza也 faeni給 ta yatatiskova人類 ta mauhpʉuhʉngʉ世界.
'e hia matoyange ta tposʉ書 tan'e這 mo a'sʉftonʉ ayʉcʉ,
ehoza ne moson'a yayo 'o iesu.
e'upa ne moso tiou受 to toonono洗,
tiou受 no hʉsvʉta判, psoyaski, mo'ma'cohio教,
ho ine moso yonto出現 mia'usnu ne /ngalilaya/ ho aotothomʉ治療 to cou人,
ataveisi isi tatoyangzi 'o ohsi yupteilʉneni ci hi'hioa to ceonʉ ne moso i'mi從 ne /ngalilaya/ ho emo'usnu去 ne /'elusalemu/,
ho i'o moso yuyafo ci hi'hioa to sotavei no mainsohʉ.
sotavei isi spica to zuuzika十字架 ho和 smoevovei活回.
'e isi tposi ta tposno fukuin tan'e.
'o iesu zou cihi ci taunona'vʉ偉大 ci lema'cohio老師.
mo yaa tonʉ no esansana 'o hoolicu法律 to hamo;
isi po'pa'cohivneni 'omo natʉ'ca 'o hpʉhpʉngʉ to hamo ci so'emio.
'o mo'ma'cohiosi te peelʉi aemoa emeoisa:
1. yonto hcuyu ho mo'ma'cohio - engha nante yu'ausna. sviei. tanua.
ho inate atotavei no 'o'oko to hpʉhpʉngʉ ne pepe (eimo soo ac'ʉhʉ to pitu soo).
2. tovei 'o maskʉ ueso ci sitoo (maskʉ soo).
3. e'usna to hpʉhpʉngʉ ne pepe ci epo'usa (maskʉ veiyauteʉ soo).
4. e'usna no atuhcu e'ausna no tesi (maskʉ veiyauveo soo).
5. e'usna no aepʉngʉ 'e hpʉhpʉngʉ ta ceoa ho ina peiseafi na hpʉhpʉngʉ to hamo (mpusku veiyaospotʉ soo; mpusku veiyuimo soo).
etaica
1. ceoceona to iesu ho ine moso yayo (1:1-2:23)
2. hi'hioa to letoonono /yohane/ (3:1-12)
3. tiou no toonono ho tiou no hʉsvʉta 'o iesu (3:13-4:11)
4. yone ngalilaya ho epeaski to fukuin 'o iesu (4:12-18:35)
5. i'mi ne ngalilaya ho ac'ʉhʉ ne 'elusalemu (19:1-20:34)
6. sotavei ci mainsohʉ ne 'elusalemu (21:1-27:66)
7. smoevovei 'o iesu ho aopa'to (28:1-20)
MATAI 1
ceoceona to emoo to iesu kilisto
(luka 3:23-38)
1:1 mo maica 'o ceoceona no emoo to iesu:
zou mʉntʉ'ca to tavite 'o iesu kilisto,
mʉntʉ'ca to 'avulahamu 'o tavite.
1:2 isi peyafa to 'avulahamu 'o 'isaku,
peyafa to 'isaku 'o yakovu,
peyafa to yakovu 'o yuta ho i'o ohaesasi.
1:3 'o yuta ho taama ihe peyafa 'o falosu ho seela,
peyafa to falosu 'o sisulun,
peyafa to sisulun 'o 'alan.
1:4 peyafa to 'alan 'o 'aminata,
peyafa to 'aminata 'o naasun,
peyafa to naasun 'o saamong,
1:5 'o saamong ho laaho ihe peyafa 'o po'asu,
'o po'asu ho lutelu ihe peyafa 'o 'opeto,
peyafa to 'opeto 'o iesi,
1:6 'o iesi isi peyafa 'o honte tavite.
'o tavite ho i'o vcongʉ to 'ulia ihe peyafa 'o solomong,
1:7 peyafa to solomong 'o lopo'an,
peyafa to lopo'an 'o 'apia,
peyafa to 'apia 'o 'asa,
1:8 peyafa to 'asa 'o yosafa,
peyafa to yosafa 'o yoolan,
peyafa to yoolan 'o 'usia,
1:9 peyafa to 'usia 'o yootan,
peyafa to yootan 'o 'ahasu,
peyafa to 'ahasu 'o sisicia,
1:10 peyafa to sisicia 'o manasi,
peyafa to manasi 'o 'amen,
peyafa to 'amen 'o yosiya.
1:11 ne ohe seolʉa no holeo to papilong 'o suezopʉ to 'isolaelu,
isi peyafa to yosiya 'o yoyacing ho i'o ohaesasi.
1:12 ataveisi ho ohe holeo to papilong,
isi peyafa to yoyacing 'o salate,
peyafa to salate 'o solopapo,
1:13 'o solopapo isi peyafa 'o 'api'i,
peyafa to 'api'i 'o 'iliacin,
peyafa to 'iliacin 'o 'aso,
1:14 peyafa to 'aso 'o satu,
peyafa to satu 'o 'akin,
peyafa to 'akin 'o 'ili,
1:15 peyafa to 'ili 'o 'iliyasa,
peyafa to 'iliyasa 'o matan,
peyafa to matan 'o yakovu,
1:16 peyafa to yakovu 'o yosefu,
'ai'ocu eno vcongʉ to maliya.
'o ihe yainca kilisto ci iesu 'aisieno peyafa to maliya.
1:17 yaica ci hia tmasvʉtʉ,
ahoi to 'avulahamu ac'ʉhʉ to tavite mo maskʉ uspotʉ no mʉntʉ'ca,
ahoi to tavite ac'ʉhʉ ne ohecu holeo to papilong mo maezo maskʉ uspotʉ no mʉntʉ'ca,
ahoi ne ohe holeo ac'ʉhʉ to kilisto mo i'vaho maskʉ uspotʉ no mʉntʉ'ca.
yayo 'o iesu kilisto
(luka 2:1-7)
1:18 moso maica na nia hia yayo to iesu kilisto:
i'o inosi maliya mohcu esvʉtʉ no navconga 'o yosefu,
at'inghi to auyusi no aʉlʉ navconga,
isi iachia cohivi to maliya micu i'mi to seilei ho yaa ngho'ʉa.
1:19 i'ontesi vcongʉ ci yosefu la mousʉngcʉ ci cou,
o'aisi 'ucia apa'ta aokoe'iya 'o maliya,
mo at'inghi yaa 'tohʉngʉ no auc'oc'ova teongasi.
1:20 ne isin'a seolʉa no siya no koyusi eni,
mo aopa'to to ceisi 'o tensi to nooe'oca,
yainca:
"mʉntʉ'ca to tavite ci yosefu,
'ote ngoheʉngeʉ,
a'cʉ'cʉna vcongʉ 'o maliya,
maica i'o ngho'ʉsi mo i'mi to seilei.
1:21 tesi peyafa 'o cihi ci oko,
teko poa iesu na tesi ongko,
maica ho tesi to'usni 'o mao'o'okosi ho poa momeesih'i no kuisihe."
1:22 homo esmi 'e acʉcʉhʉ ci hi'hioa eni te mia 'o ohsila ieni to eyongensa to nooe'oca ho yainca:
1:23 "panto oko no mamespingi tena ngangho'ʉ ho yaa oko,
na tesi ongko te poa 'imaneli." (na e'ausnasi ta "'imaneli" zou "no'upu a'to 'o hamo".)
1:24 mo peihsasmome 'o yosefu,
cu maito hia eutotavei to tensi ho hioa,
sʉemʉema 'o maliya;
1:25 at'inghi auyusi no yayo 'o oko o'amo noepohʉ to hopo.
ne micu yayo 'o oko,
isicu tos'ongki to yosefu ho poa iesu.
MATAI 2
i'mi ne esmomhana ci cou
2:1 ne moso honte 'o helote,
mo yayo to veculehemu ne yutaya 'o iesu.
mo piyo cila buhcacongeoha mo i'mi to esmomhana ho cmʉ'ho ta 'elusalemu;
2:2 ihe tuocosi:
"i'o mon'a yayo cite honte ta couyutaya mo yonenu?
imza aiti ta esmomhana 'o congeohasi,
mimza mna'o uhtan'e ho p'ohkui."
2:3 isi talʉi to helote 'e e'e eni,
mo na'no 'oha ma'suseomʉ;
acʉhʉ 'o yata hosa ta 'elusalemu mo maezo 'oha ma'suseomʉ.
2:4 isicu acʉha eteuyuna to helote 'o saisicoo ho i'o lema'cohio seiso,
isi tuocosi:
"nte yayo nenu na kilisto?"
2:5 ihe yut'inga:
"te yayo to veculehemu ta yutaya,
maica mosola mainca 'o nia hia tmopsʉ to eyongensa:
2:6 veculehemu ta mia'usnu ta yutaya,
o'a mikos'a so'okosia ta mahohosa ta yutaya;
maica panto mo cihi ci taicini te i'mi suu ho yuyafo,
tesi aʉt'ʉca 'e 'o'oko'u ci 'isolaelu."
2:7 isicueno auc'oc'ova eoho'a to helote 'omo i'mi ne esmomhana cila buhcacongeoha,
mi'usni ho tuucocosi na a'ʉmtʉ hiesi ho moso yuyafo 'o congeoha,
2:8 isicu cucufni ho poa emo'usnu ne veculehemu,
yainca:
"temu uhne'e,
bumemeala i'ima na oko,
ho tamucu elʉa,
tamu eʉsvʉta a'o.
ta'u ko'ko maezo uso ho m'ohkuyu."
2:9 ihe talʉi 'e e'e eni,
micu e'ohʉ.
ne mio,
i'o ohe aiti ta esmomhana ci congeoha mio ivaho yuyafo,
a'vinano papoevʉ ho engocha,
ec'ʉha to isi yoni yayo to oko micu tosvo.
2:10 ihe aiti 'o congeoha ic'o,
a'ʉmtʉs'a kaebʉ ho 'aveoveoyʉ.
2:11 micu yʉmeʉmʉ to emoo,
aiti 'o oko ho i'o inosi ci maliya,
cu m'ocnguyu ho p'ohkui 'e oko eni,
ihecu paavi 'o tvoisia pepe ci macucuma,
tuyafa 'o king,
konamusngau,
ho i'o s'os'o ho teonghia to oko.
2:12 mo mito ceihe 'o hamo ho eʉsvʉta ho o'tena poa yuovei baito to helote,
micu mito h'unasi ci ceonʉ ho emomaine'e.
p'usnu ne 'ezivuto
2:13 ataveisi ne micu e'ohʉ,
mo aopa'to to cei to yosefu 'o tensi to hamo,
yainca:
"yʉc'ʉ! hafa si oko ho isi inosi ho p'usnu ne 'ezivuto,
yone'en'a,
ac'ʉhʉ ho ta'ucu eucufna suu ho mongoi;
maica tesi yuseiseita to helote 'e oko eni,
akoeva no opcoza."
2:14 micu yʉc'ʉ 'o yosefu ho e'ohʉ.
hafa nemo feʉngna 'e oko ho i'o inosi ho p'usnu ne 'ezivuto,
2:15 yone'e,
ac'ʉhʉ ne mohcu mcoi 'o helote.
na'e hi'hioa eni isi mia 'o ohsila psoemiza to eyongensa to hamo ci e'e:
"te'o e'eafi ne 'ezivuto 'o oko'u."
opcoza 'o 'o'oko
2:16 micu bochio 'o helote ho ihe tonongonongoi to lebuhcacongeoha,
mo kuici ma'sʉsʉ'no,
ieni to ohsi talʉi tola buhcacongeoha ci hiesi no yuyafo 'o congeoha,
popeosmuhnu to cou ho uhne veculehemu ho ito aukukuyungusi ho pohcʉcʉha 'omo afu'un'a topuska ci 'o'oko no haahocngʉ.
2:17 'e hi'hioa eni isi mia 'o ohsi engha to eyongensa 'elimia ci e'e:
2:18 ne laama isicu tac'ʉhi
'o fihngau no tmunoi mongsi.
isi tngisi to leice 'o 'o'okosi,
o'amo tiou honte ao'pova,
maica micu tʉcʉcʉhʉ 'o 'o'oko.
i'mi ne 'ezivuto ho yuovei
2:19 ataveisi ne mohcu mcoi 'o helote,
ne 'ezivuto,
mo aopa'to to cei to yosefu 'o tensi to hamo,
2:20 yainca:
"yʉc'ʉ! hafa si oko ho isi inosi ho yuovei to ceoa ne 'isolaelu,
maica micu mcoi 'o mosola mici opcoi ta oko ci cou."
2:21 micu e'ohʉ 'o yosefu,
hafa 'o oko ho i'o inosi ho yuovei ne 'isolaelu.
2:22 maica ho isi tac'ʉhi to yosefu 'o 'acilo homo biuski to amosi ci helote ho honte ta yutaya,
o'amo smeecʉ'ho uhne'e.
ataveisi,
'o hamo isi ivaha ieni to cei ho eʉsvʉta to yosefu,
micu aotoefʉngʉ ho uhta mia'usnu ta ngalilaya,
2:23 yonto la yainca nazalo ci hosa hocu nochʉmʉ.
na eni isi mia 'o ohela engha to eyongensa ci e'e:
"tehela yainca zou counazalo."
MATAI 3
epeaski to fukuin 'o letoonono yohane
(maluko 1:1-8; luka 3:1-18; yohane 1:19-28)
3:1 ne mio,
'o letoonono yohane mo esmi ta mamaepuhu ta yutaya ho epeaski to fukuin.
3:2 isi yainca:
"ma'voveicu,
tec'u mon'i esmi 'o hpʉhpʉngʉ ne pepe!"
3:3 'e yohane 'aeno 'o ohsila engha to eyongensa 'izaya ci cou;
isi yainca:
ne maepuepuhu panto mo moozoyʉ ci cou:
ayocneni no tesi ceonʉ 'o nooe'oca,
ptusngʉcvi 'o tesi mia ci ceonʉ!
3:4 'o yohane mo sʉ'eʉsʉ to mo yaa m'um'u no lakuta ci yʉsʉ,
'o cpʉh'osi mo smoeputu to feo'u;
'o lasi ana zou liu ho sʉhsi.
3:5 'o botngonʉ ci cou mo i'mi ne 'elusalemu,
i'ngabo ta yutaya,
ho mia'usnu to c'oeha ne yolutan ho uhto tuhcu to yohane.
3:6 ihe esansana na kuisihe,
cu yonto c'oeha to yolutan ho tiou to toonono to yohane.
3:7 isi aiti to yohane mo 'enepio ci coufalisai ho cousatukai mo maezo esmi ho noa toonono,
isi mi'usni ho yainca:
"'e 'oahngʉ no mahiz'o ci fkoi!
tec'u mon'i esmi na yʉsvʉtʉ to hamo,
mimun'asi ma'unano temu meelʉ toekameosʉ totoefʉngʉ?
3:8 temula boemi no peipeis'ausna ho pa'teni na hia mimucu ma'vovei.
3:9 'ote ma'unano zou'so maameoimu 'o 'avulahamu ho yainca te meelʉ totoefʉngʉ no yʉsvʉta.
te'o eʉsvʉta muu,
'o hamo te meelʉ mayo ta fatu tan'e ho mooyai no tesi mʉntʉ'ca to 'avulahamu!
3:10 isicu topceni ta peongu ta evi 'e peʉcngʉ,
inate afu'u o'te beahci ci evi te acʉha teoca,
ho to'seni to puzu.
3:11 te'o titho ta chumu ho toononvi muu,
te humzi ho mimucu ma'vovei;
at'inghi,
'o tena uafeihihe a'o ci ic'o tesi titheni no seilei ho ino puzu ho toononvi muu.
mo na'nohe taicini a'o,
o'ate mako 'aseolʉ hoci'u tiatatvineni no sapiei.
3:12 mo mʉpʉtʉ to siothua 'o emucusi,
tesi pusi 'o isi tov'oha,
soʉlʉlʉa to tvo'oanʉa 'o heome;
i'ocu piesisi te boemi to 'auesiesi o'ate afsi ci puzu ho poa houcʉcʉhʉ!"
tiou to toonono 'o iesu
(maluko 1:9-11; luka 3:21-22)
3:13 ne mio,
mo i'mine ngalilaya 'o iesu ho emo'usnu to c'oeha ne yolutan ho baito to yohane,
m'eya toonono to yohane.
3:14 isi 'ucia aezuha to yohane na 'tohʉngʉsi,
cu yainca:
"mante'o noahe toonono suu,
mainci miko'so apuyu biebimi a'o!"
3:15 at'inghi isi yut'inga to iesu:
"'ateno maican'a nate hioa,
maica teto fihi na lasi esvʉta to hamo." isicueno tiova to yohane.
3:16 ne micu tiou to toonono 'o iesu,
i'mi to chumu ho yuyafo,
mo maavo 'e pepe;
isi aiti 'o piepiya to hamo mo mais'a hofoyu ho ohpueho,
tosvo to feango to iesu.
3:17 acnguhu,
panto mo i'mi ne pepe ci fihngau ho mainca:
"zou songohia ci oko'u eni,
la'u ʉm'ʉmnʉa."
MATAI 4
tiou to hʉsvʉta 'o iesu
(maluko 1:12-13; luka 4:1-13)
4:1 acnguhu,
mo noa eahafa to seilei 'o iesu ho uhto maepuepuhu,
noa hʉsvʉta to 'akuma.
4:2 ataveisi no mimsʉptʉhi homo tanzi,
cu sieo 'o iesu.
4:3 i'omo bʉhsʉftʉ mo smacmu'u to iesu ho yainca:
"ho zoueno oko to hamo suu,
tekon'a pashʉi 'emo maica ci fatu ho poa tmuezuhu pang!"
4:4 yut'inga to iesu:
"yainca to seiso:
""homo yaansou 'e cou o'a moc'o anou noe'ocʉ ta 'oanʉ,
mamo noe'ocʉ to macoconi ci e'e to hamo."" "
4:5 isi ivaha hafa to 'akuma 'o iesu ho uhto socofkoya ci hosa,
poa yac'ʉ to sopepea to seiten,
4:6 mi'usni 'o iesu ho yainca:
"ho zoueno oko to hamo suu,
teko meipeohʉ;
maica ho isi yainca to seiso:
tesi cucufni to hamo 'o tensi;
tehe yomza to emucuhe ho e'oca suu,
te o'te smololongʉ ta fatu si t'angosu."
4:7 yut'inga to iesu:
"at'inghi isi yaeza yainca to seiso:
""teav'a hʉsvʉta 'o nooe'oca - 'o hamosu."" "
4:8 ataveisi,
isi hafa to 'akuma 'o iesu ho uhtomo na'no pepe ci hcuyu,
poa aitneni to iesu 'o mauhpʉhpʉngʉ ho i'o psoevohngʉsi.
4:9 yainca to 'akuma:
"hociko pop'up'ungu ho m'ohkuyu a'o,
te'o faeni suu 'e acʉcʉhʉ eni."
4:10 yut'inga to iesu:
"satan,
smase'u!
yainca to seiso:
""la m'ohkuyu to nooe'oca - to hamosu,
i'oc'o hamo nate p'ohkui."" "
4:11 micu mongoi to iesu 'o 'akuma,
ihecu usa to tensi 'o iesu ho aʉt'ʉt'ʉca.
ahoi yone ngalilaya 'o iesu ho psoyaski to fukuin
(maluko 1:14-15; luka 4:14-15)
4:12 isi tac'ʉhi to iesu ho isi poekotva to poo'usna 'o yohane,
cu totoefʉngʉ.
uhne ngalilaya.
4:13 o'amo amiocni ne nazalo,
namamo uhnehe kapenong.
'o hosa ic'o mo yonto mia'usnu ne sipulong ho nafutali,
cum'u to etʉpʉ to ngalilaya.
4:14 na eni isi mia 'o nia e'e to eyongensa 'izaya:
4:15 'e ceoa ta sipulong ho ceoa ta nafutali,
ceonʉ ta a'ofeihni ta etʉpʉ.
ta'esi ta c'oeha ta yolutan,
ngalilaya to couyafana!
4:16 i'o mo no'ayumonʉ to voecʉvcʉ ci cou
te teolʉ to meoino no tiskova;
i'o mo yonto isi pe'ongki to mcoi ci cou.
panto tiskova cite mahtiskou.
4:17 ahoi ne mio,
mo epeaski to 'e'e 'o iesu ho yainca:
"nahocu ma'vovei,
maica ho tec'u mon'i esmi 'o hpʉhpʉngʉ ne pepe!"
eyoho'a to iesu 'o sʉptʉ ci leeyayoskʉ
(maluko 1:16-20; luka 5:1-11)
4:18 mo smai'ofeihni to aaskiti to etʉpʉ ne ngalilaya 'o iesu,
teolʉi 'o nat'ohaesa ci leeyayoskʉ,
zou saimong ('o tos'ongkasi zou petelo) ho i'o ohaesasi ci 'antole,
mo seolʉa no yonto etʉpʉ ho tokeʉpʉ.
4:19 isi mi'usni to iesu ho yainca:
"uhtan'e.
to'ofeihni a'o!
te'o poa tolʉ no cou ci leeyayoskʉ na muu."
4:20 ihecu osnia teongasi 'o keʉpʉ no yoskʉ,
cu to'ofeihni to iesu.
4:21 mo ivaho emosuhcu 'o iesu,
teolʉi 'o h'unasi ci nat'ohaesa - zou oko to sipitai ci yakovu ho yohane;
mo i'upu to amohe ho yonto 'apangʉ ho tmasuce to keʉpʉ no yoskʉ.
isi eyoho'a to iesu,
4:22 ihecu osnia teongasi 'o 'apangʉ,
eutotavei to amohe,
cu to'ofeihni to iesu.
mo'ma'cohio 'o iesu ho aotothomʉ
(luka 6:17-19)
4:23 isi saingaboa to iesu 'o hpʉhpʉngʉ ta ngalilaya,
yonto kaitoo to mahohosa ho mo'ma'cohio to cou,
epeaska 'o fukuin to hpʉhpʉngʉ ne pepe,
aotothoma 'o mav'ov'o ci tma'congo to cou.
4:24 micu psoengabo ta siliya 'o ongkosi,
ahoi tan'e.
'o yane'e ihe hafa 'omo tma'congo no mav'ov'o ho i'omo mav'ov'o ci la 'aotutumzo ci cou:
maito isieno cʉnghi no hicu,
tensen,
meaupsu'hu,
acʉha hafa uhto iesu,
isi macoconi poa yov'oa to iesu.
4:25 maobotngonʉ ci cou mo i'mi ne ngalilaya,
tikapoli,
'elusalemu,
yutaya,
ho mia'usnu to apihana to c'oeha ne yolutan ho to'ofeihni to iesu.
MATAI 5
yonto hcuyu ho mahsʉsʉftʉ
5:1 aiti to iesu 'emo botngonʉ ci cou,
cu uhto hcuyu;
ne micu yusuhngu,
mo nokuyungu 'o tesisi.
5:2 isicu ahoza po'pa'cohivi:
e'usnu no ʉm'ʉmnʉ
(luka 6:20-23)
5:3 "'ola mainca no koyu mo aviovio na piepiya ci cou.
a'ʉmtʉs'a ʉm'ʉmnʉ;
na hin'i zou 'o'oko to hpʉhpʉngʉ ne pepe!
5:4 'ola nomio no kuisi ho nac'o ci cou a'ʉmtʉs'a ʉm'ʉmnʉ;
tesi ao'pova to hamo!
5:5 'ola ma'cocacni ci cou a'ʉmtʉs'a ʉm'ʉmnʉ;
tahela tiuska 'o ohsila teomneni to hamo ci ezoezoyʉ!
5:6 'ola tongtongsoyʉ no peismi no 'tohʉngʉ to hamo ci cou;
a'ʉmtʉs'a ʉm'ʉmnʉ;
tesi a'sʉftona poa am'amso to hamo!
5:7 'ola boemi no ma'cocacni ho mi'usnu ta cou a'ʉmtʉs'a ʉm'ʉmnʉ;
tesi yaeza yomza no ma'cocacni to hamo ho mi'usni!
5:8 'ola tʉs'ʉ ci 'tohʉngʉ a'ʉmtʉs'a ʉm'ʉmnʉ;
tehe teolʉi 'o hamo!
5:9 'ola cucufnu no moususemʉ ci cou a'ʉmtʉs'a ʉm'ʉmnʉ;
tesi ta'okoa to hamo!
5:10 'ola nomio no peiseafi na 'tohʉngʉ to hamo ho noa pohtutumza ci cou a'ʉmtʉs'a ʉm'ʉmnʉ;
zou 'o'oko to hpʉhpʉngʉ ne pepe!
5:11 "i'mi ho lamu'so to'ofeihni a'o ho aokoe'iya muu,
pohtutumza muu,
ekuzkuzoa ho eayaezoya muu,
mimu a'ʉmtʉ ʉm'ʉmnʉ.
5:12 la 'aveoveoyʉ ho kokaekaebʉ,
maica isi songacveni tomo atngaso ci temu hnoo ne pepe;
'o nia eyongensa ne noana'o mosola maica ho noa pohtutumza to cou."
sieu ho tiskova
(maluko 9:50; luka 14:34-35)
5:13 "zou sieu ta yatatiskova muu.
hoci payo'a na maski ta sieu,
'anate peelʉi ivaha poa maskia.
zoucuc'o caciha,
mooeza cuc'o ciha,
ho 'op'eciha ta cou.
5:14 "zou tiskova ta hpʉhpʉngʉ muu.
'o isi p'eyac'a ta hcuyu ci hosa o'ate peelʉi tofeʉ'si.
5:15 uk'a cite sotiskou ho sof'uf'a no pangka,
ahta o'te siya tola tnguci ho poa nopopayoa,
tesieno psoetiskovi 'e cono emoo.
5:16 totiski,
na tiskovamu nte yaeza poa psoetiskou ta tuhcu ta cou,
poa aitneni ta cou na ʉmnʉ ci lamu peipeis'ausna,
teno tohmomoengʉ tomo yone pepe ci amomu."
e'usnu no hoolicu
5:17 "teav'as'a ta'unano te'o aapayo'a 'o hoolicu to moose ho i'o h'omahsʉfta to eyongensa na atuhcusi ho mi'o cmʉ'ho.
o'ate'o cmʉ'ho ho aapayo'a,
ma te'o aepʉnga na aʉ'ʉmtʉsi.
5:18 te'o a'ʉmta eʉsvʉta muu,
hocin'a afu'u yayo 'e hpʉhpʉngʉ.
'emo conci topca,
cono meesʉzʉ ci tposʉ ta hoolicu o'ate aapayo'a,
ac'ʉhʉ ho tac'u noepʉngʉ 'e aʉcʉcʉhʉ.
5:19 ko'koeno,
'ola yuszozʉ tamo so'okosia ci h'oesvʉta,
a'vinano pa'cohivi na mocmo ho poa peis'ofeihni,
ho tac'u yonto hpʉhpʉngʉ ne pepe tena so'okosia.
apuyu,
'ola meot'ʉcʉ to hoolicu ho yaeza poa peis'ofeihni na mocmo ci cou,
ho tac'u yonto hpʉhpʉngʉ ne pepe,
tena atva'esi meoisi.
5:20 te'o eʉsvʉta muu,
na temula hia meot'ʉcʉ no 'tohʉngʉ to hamo temu asansano tosa'ohe to lema'cohio seiso ho ito coufalisai niantemu meelʉ yʉmeʉmʉ to hpʉhpʉngʉ ne pepe."
e'usnu論 no sʉ'no發怒
5:21 "ohmucula過確你們 talʉi聽,
ohela他們被 potani禁戒 no nia noana'o祖先:
""'otela不要 opcoi殺;
nate要是 opcoi殺 te要 tiou受 no yʉsvʉta判.""
5:22 at'inghi但 te'o要我 eʉsvʉta告訴 muu你,
nala若 mi'usnu no nat'ohaesa兄弟 ho和 ma'sʉsʉ'no怒,
nte會 maezo也 tiou受 no yʉsvʉta判;
nala若 ekvo'ʉ罵 no nat'ohaesa兄弟 ho和 yainca叫 ""ko'cacuma廢物"",
te要 uhne去 hooin法院;
ekvo'ʉ罵 no nat'ohaesa兄弟 ho yainca叫 ""longkeckece蠢東西"",
o'ate不能 tomempuesu逃 no puzu火 ne vooecʉvcana地獄.
5:23 ko'koeno因此,
hoteko要你 yonto 'oyona sʉ'tʉ祭壇 ho mici mofi供 no sʉ'ta祭拜 to hamo上帝,
hociko要你 talʉa想 pano有 mo在 'oha不 toseolʉ滿 suu你 ci nat'ohaesa兄弟,
5:24 nteko要你 teonʉ'vina'a留 ta 'oyona前 sʉ'tʉ祭壇 na macucuma東西,
osni biebimi見面 ho eususeomʉ和解,
takocu然後 yuovei回 ho sʉ'teni獻給 to hamo上帝 na sʉ'tasu供物.
5:25 "hoci panomo ehpʉngʉ suu ci cou,
e'usna ne hooin na suu,
nteko ieni ho o'amocu mo uhne hooin ho eususeomʉ.
hoci o'te maica,
hocic'u yʉmeʉmʉ to hooin tasicu toveineni to hookang na suu,
'o hookang tasicu toveineni to kengsacu,
poekotva to poo'usna.
5:26 te'o eʉsvʉta suu.
teko noekotu,
ac'ʉhʉ ho takocu yoepʉngi na sotavei ci peisu no tmuhnoa."
e'usnu no mseezo
5:27 "ohmucula talʉi panto mo maica ci hia mahsʉsʉftʉ no nia noana'o:
""'otela mseezo.""
5:28 at'inghi te'o eʉsvʉta muu,
nala teolʉ no mamespingi ho ma'cac'ou,
micu yonta 'tohʉngʉsi ho mseezo ta mamespingi ho ca'i 'e 'tohʉngʉsi.
5:29 hocisi poa peiskuisi ta vhona ta mcoosu,
te yuyafi ho ciha!
hoci payo'a 'e moc'o okosi ci 'oahngʉ ta feango te ʉmnʉhe no aucunva to'seni ne vooecʉvcana 'e feango.
5:30 hocisi poa peiskuisi ta vhona ta emucusu,
te hitenva ho ciha!
hoci payo'a 'e moc'o okosi ta 'oahngʉ ta feango,
te ʉmnʉhe no aucunva to'seni ne vooecʉvcana 'e feango."
e'usnu no teongasi na vcongʉ
(matai 19:9; maluko 10:11-12;
luka 16:18)
5:31 "panto mo maica ci hia mahsʉsʉftʉ:
""inate afu'u mochi no vcongʉ,
ahtu o'te tmopsʉ no tposno yupeevai ho faeni ta mamespingi.""
5:32 at'inghi te'o eʉsvʉta muu,
hoci o'te nomio no smoc'ou 'e mamespingi,
o'ate peelʉi aha'va ciha ta hahocngʉ.
maica,
hoci mevaho mevcongʉ 'e mamespingi,
'ateeno mais'a 'e hahocngʉ namo himhohioa ho poa mseezo 'e mamespingi;
namo i'vaho himhovcongʉ ci hahocngʉ te ta'upa no yaa kuisi no mseezo."
e'usnu no esvʉtʉ
5:33 "ohmu la yaeza talʉi 'omo mainca ci mahsʉsʉftʉ no nia noana'o:
""'ote yuf'uhu no esvʉta;
na imu afu'a mi'usneni no nooe'oca ci esvʉta temu asansana fihi.""
5:34 at'inghi te'o eʉsvʉta muu,
asansano o'a temu meelʉ esvʉtʉ.
'ote mi'usnu ta engʉca ho esvʉtʉ,
maica zou suoca'ha to hamo 'e engʉca;
5:35 'ote mi'usnu ta ceoa ho esvʉtʉ,
maica lasi 'op'eciha to hamo 'e ceoa;
maezo 'ote mas'usnu ta 'elusalemu ho esvʉtʉ,
maica zou hosa to someoino honte 'e hosa eni;
5:36 ac'ʉhʉ no 'ote mi'usnu ta iachisu fnguu ho esvʉtʉ,
maica o'a teko peelʉi poa aezuhu kua'onga ho fʉecʉ'za 'e f'ʉsʉsu.
5:37 hotemula ya'ei,
hoci zou,
'ateeno yainca zou,
hoci o'a,
'ateeno yainca o'a;
hocin'a esuhcu eman'i;
micu i'mi no kokuzo."
e'usnu no auski
(luka 6:29-30)
5:38 "ohmula talʉi panto mo maica ci hia mahsʉsʉftʉ:
""peʉezi no mcoo na mcoo,
peʉezi no hisi na hisi.""
5:39 at'inghi te'o eʉsvʉta muu,
teav'a auska 'ola pohcinghi muu ci cou.
5:40 hoci panote muutu ta vhona ta pinosu,
'ateeno moeza poa t'o'upneni si veinasi!
hoci yaa ehpʉngʉ ho e'usna ne hooin na suu,
'ucia yaa na osko as'oya.
'ateeno moeza yo'upneni na osko aoskopa!
5:41 hoci panonte e'hʉyʉ suu ho 'ahʉya pahafi no macucumasi ho poa mino mo
1 kilo ci ceonʉ,
'ateeno moeza fihi ho coeconʉ nomo
2 kilo ci ceonʉ!
5:42 hoci panonte mi'usnu suu ho m'eya macucuma,
'ateeno fii;
hoci panonte mi'usnu suu ho yuevaho no cuma,
'ateeno poa yuevahneni."
e'usnu no himngonghi no hangʉ
(luka 6:27-28, 32-36)
5:43 "ohmula yaeza talʉi 'o mo maica ci hia mahsʉsʉftʉ:
""ngohia na nanghiasu,
sʉ'nova na hangʉsu.""
5:44 at'inghi te'o eʉsvʉta muu,
temu ngohia na hangʉmu,
a'vinano 'inolineni nala pohtutumzo muu ci cou.
5:45 maicac'o,
niantemu meelʉ tma'oko to amopepe.
maica'sio,
'o amopepe lasi psoetiskovi no hie 'omo ʉmnʉ ci cou,
lasi yaeza psoetiskovi 'omo kuici cou;
lasi fii no mʉchʉ 'ola popeis'ʉ'ʉmnʉ,
yaeza fii 'ola popeiskuzkuzo.
5:46 hocimuc'o ngohia nala himngonghi muu,
mainci tesi aac'o 'ahʉya tohnoi to hamo na muu?
'alaeno maezo meelʉ maica 'ola letmuhno!
5:47 hocimuc'o mi'usnu no nanghiamu ho tooyokeo,
cumanante koa itanveni?
ac'ʉhʉ to couyafana 'alaeno maezo maica!
5:48 temula a'sʉftonʉ,
aʉlʉ mais'a 'o amomu pepe na hia a'sʉftonʉa."
MATAI 6
e'usnu no to'usnu
6:1 "temula bumemealʉ,
'ote yono tuhcu no mocmo ci cou ho paata'zeni na iachi ma'einu,
ezua poa aitneni no mocmo.
hoci maica,
o'anatemu meelʉ mayo nomo i'mi to amopepe ci hnoo.
6:2 "ko'koeno,
ho tekola to'usnu no mocmo,
'otela meela'pa ho esvocʉ,
mais'a 'olahe hioa tola me'ʉ'ʉmnʉ ci cou ho yonto kaitoo ho ito maceoceonʉ,
akoyu no noa tohmomoengʉneni to mocmo ci cou.
te'o eʉsvʉta muu,
hola maica 'e hioahe.
ihecu elʉa na ntehe hnoo.
6:3 ho lako to'usnu to mocmo,
teav'a poa cohivneni ta veina ci emucu na isi hioa ta vhona ci emucu,
6:4 na eni nte aotoefʉngʉ ci hi'hioa.
maicac'o,
i'ola teolʉ tola aotoefʉngʉ ho peis'ʉ'ʉmʉ ci amopepe.
tesi ahtao'te tohnoi suu."
e'usnu no 'inoli
(luka 11:2-4)
6:5 "ho temula 'inoli,
'ote mais'a 'ola me'ʉ'ʉmnʉ ci cou,
kaebʉ homo no'ayumonʉ to kaitoo hocieno yac'ʉ to peovainʉ ho 'inoli,
ezua poa aitneni to mocmo ci cou.
te'o eʉsvʉta muu,
homo maica 'o hioahe ihecu elʉa na ntehe elʉa ci hnoo.
6:6 ho teko 'inoli,
la yʉmeʉmʉ to mʉ'eona,
emʉta 'o phingi,
mi'usnu tola nootoefʉngʉ ci amopepe ho 'inoli.
i'ola teolʉ tola nootoefʉngʉ ci hioa ci amopepe,
tesi ahtao'te tohnoi suu.
6:7 "ho temula 'inoli,
'ote mais'a 'o couyafana,
evaevoezuhu to uk'a ci e'a'ausnasi ci e'e,
lahe yainca no koyuhe,
hoci mako etacvoh'i evaphopho.
tesicu talʉi ta hamo.
6:8 'otes'a maita lahe hioa.
auyusi ho temu 'inoli,
isicu cohivi to amomu pepe na 'tohʉngʉmu.
6:9 ko'koeno,
la maica na temu hia 'inoli:
amomia ta pepe:
acʉhʉ'so einu to cofkoya ci ongkosu 'e cou;
6:10 teko'so atʉkca 'e hpʉhpʉngʉ;
hioa ta ceoa na 'tohʉngʉsu,
mais'a no lako hioa ne pepe.
6:11 pafi no temia titha ci 'oanʉ maitan'e.
6:12 peu'uzva ho lamia mi'usnu suu ho peis'epo,
mais'a ho lamia peu'uzva 'ola mi'usnu a'mi ho peis'epo ci cou.
6:13 teav'a poa elʉ no o'a temia pasvo'ha ci hʉsvʉta;
to'usni a'mi ho momeesih'i no emucu no kokuzo.
6:14 hocimu peu'uzva na peis'epo no mocmo ci cou,
'o amomu pepe tesi yaeza peu'uzva muu;
6:15 hocimu o'te peu'uzva na peis'epo no mocmo ci cou,
yaeza o'a tesi peu'uzva to amomu pepe na peis'epomu."
e'usnu no tanzi
6:16 "holamu seolʉa no tanzi,
'ote mais'a 'ola me'ʉ'ʉmnʉ ci cou;
la emozu huaeca 'atutumio,
emozu tiehocʉ ho ca'i 'o sapci,
ko'ko poa honganeni to mocmo homo seolʉa no tanzi.
te'o eʉsvʉta muu,
hola maica 'o hioahe ihecu elʉa na ntehe elʉa ci hnoo.
6:17 ho teko seolʉa no tanzi,
la meʉpsʉpsʉ ho yomuyu,
6:18 teav'a poa honganeni no mocmo ho miko seolʉa no tanzi,
poac'o cohivneni to la nootoefʉngʉ ci amopepe;
i'ola teolʉ to lako aotoefʉnga hioa ci amopepe.
tesi ahtao'te tohnoi suu."
e'usnu no yupasʉ ne pepe
(luka 12:33-34)
6:19 "teav'a a'pʉ'pʉneni no yupasʉ ta ceoa 'e iachi,
maica la yaa bonʉ ci yoi,
te maezo fkʉngeo,
maezo yaa yaksai ho yʉh'ʉtʉ to phingi ho peo'eoza.
6:20 la a'pʉ'pʉneni no yupasʉ 'e iachi ho siya ne pepe;
uk'a ci yoi ne'e,
o'ate fkʉngeo,
maezo uk'a ci yaksai cite yʉmeʉmʉ ho peo'eoza.
6:21 mo yonenu na yupasʉsu,
te maezo yono ic'o na 'tohʉngʉsu."
tiskova ta feango
(luka 11:34-36)
6:22 "'e mcoo mais'ahoci lampu ta feango.
hoci ʉmnʉ 'e mcoosu,
te acʉhʉ tiskova 'e feango;
6:23 hoci kuzo 'e mcoosu,
te acʉhʉ voecʉvcʉ 'e feango.
totiski,
hoci aezuhu voecʉvcʉ na tiskova ta 'ayumonasu,
'e voecʉvcʉ eni nte mainenu na hia ko'sosmoyoa!"
hamo ho ina yupasʉ
(luka 6:13; 12:22-31)
6:24 "uk'a cite meelʉ aʉt'ʉt'ʉcʉ nomo yoso ci tauke,
hocisi o'te kuzoa eni,
ʉmnʉa ic'o,
te einva eni potfʉnga ic'o,
o'atemu ahtu meelʉ soskuskunu to hamo,
ho maezo tolei no yupasʉ.
6:25 "ko'koeno te'o eʉsvʉta muu,
'otela nomio no temu tititha no h'oyunsova ci 'oanʉ,
hocieno 'i'ihosa ho ma'tipvongʉ.
o'a mos'aeno tosa'ohe no 'oanʉ na nsou,
o'a mos'aeno tosa'ohe no 'i'ihosa 'e feango?
6:26 temu aiti 'o zomʉ cila toesoso ta pepe:
o'ala emʉm'ʉ o'ala a'pʉ'pʉyʉ,
maezo o'ala mosoyocʉ no tehe 'oanʉ to tvo'oanʉa,
leasin'a aʉt'ʉca to amomu pepe!
o'a mimus'aeno tosa'ohe to zomʉ?
6:27 ta taicomu siya nate meelʉ boemi no ma'tipvongʉ ho esuhca na nsoumu?
6:28 "mainci nomio no yʉsʉ ho ma'tipvongʉ?
yue'iya 'o tafiseongʉ ta yʉn'ʉ lea mainenu na lasi hia cmʉfeʉa!
o'ala yaahioa o'ala tme'si no yʉsʉ;
6:29 at'inghi te'o eʉsvʉta muu,
ac'ʉhʉ to hia taotofsi'i to solomong,
'o 'i'ihosasi maezo o'amo h'unano toc'ʉhʉ to bʉvnʉ ta yafana na hiasi yonghu.
6:30 'e maukukuzo ho bʉvnʉ ta yʉn'ʉ la cmʉfeʉ ta taseona maitan'e,
oemi'mi ho micu hucma,
lac'u to'seni to pupuzu ho hmoi,
leasin'aso yaica ci hia paehongsa to hamo,
o'atesis'aeno afnasa pafi no yʉsʉ na muu?
la angu okosi na singkoomu!
6:31 ko'koeno,
'otela nomio no cuma nate ana,
cuma nate ima,
hocieno cuma nate paceofa ho ma'tipvongʉ;
6:32 'emo maica ci hi'hioa malahe atva'esa peehʉhʉi to o'ala tmaa'uzo ci cou.
'o amomu pepe lasi cohivi ho temu titha 'emo maica ci macucuma.
6:33 temula auevahe i'ima na tesi hia esmi no hpʉhpʉngʉ to hamo,
meot'ʉcʉ no 'tohʉngʉsi,
'e mo maica ci macucuma tesi ahtao'te acʉha faeni muu.
6:34 ko'koeno,
o'atemu ta'tipvonga na hucma,
maica pano te yaeza ta'tipvonga ho hucma;
'e ngoveo ta conohie tec'u amso hote ngoevi ta conohie."
MATAI 7
'ote eafafeoyʉ no mocmo ci cou
(luka 6:37-38,
41-42)
7:1 "'otela eafafeoyʉ no cou,
tesieno o'te yʉsvʉta to hamo na muu.
7:2 maica,
la mainenu na lamu hia eafafeoyʉ no cou,
te totiski na tesi hia yʉsvʉtʉ muu to hamo;
hocimu boemi nomo mainenu ci peosvʉta ho meosvʉtʉ,
tesi yaeza titheni nomo totiski ci peosvʉta to hamo ho peosvʉtneni muu.
7:3 mainci osko teolʉihe na mo subkongʉ no mcoo no nat'ohaesa ci yompuhu,
ho o'te cumasa na mo yonta mcoosu ci ehti no evi?
7:4 mo yaa ehti no evi si mcoosu,
te mainenu hoci meelʉ mi'usnu no nat'ohaesasu ho yainca ""te'oeno iseafa simo subkongʉ ta mcoosu ci yompuhu""?
7:5 sila hia me'ʉ'ʉmnʉ ci cou,
ma aueva iseivha simo subkongʉ ta mcoosu ci ehti no evi,
teeno buhsansano te yainenu ho 'iseafa na mo subkongʉ no nat'ohaesa ci yompuhu.
7:6 "teav'a to'seni no av'u 'emo socofkoya ci macucuma,
'e av'u te miezuhu ho yo'eoca muu;
teav'a to'seni no feʉ'ʉ 'o sinzu,
tehe psaatau'fua ta t'angohe 'o sinzu."
m'ene,
biebimi,
tmo'tukʉ no phingi
(luka 11:9-13)
7:7 "hocimu m'ene,
te m'elʉ;
biebimi,
te elʉa;
tmo'totokʉ no phingi,
te paavneni no phingi muu.
7:8 maica inala afu'u m'ene,
te m'elʉ;
nala biebimi,
te elʉa;
nala tmo'totokʉ no phingi,
tec'u maavo 'o phingi.
7:9 ta taicomu siya nala m'eya pang na oko,
nama fii no fatu?
7:10 m'eya yoskʉ,
nama fii no fkoi?
7:11 lamu e'vono kokuzo,
lean'a cohivi ho fii nomo ʉmnʉ ci macucuma na iachi 'o'oko,
namo yone pepe ci amomu o'a tesis'aeno fii nomo asuhcu ʉmnʉ ci macucuma namo afu'u m'ene ci cou?
7:12 "ko'koeno,
hocimu mici noa yainenu no mocmo ci cou,
'ateeno mainenu nate hia mi'usnu no mocmo ci cou;
'aeno eni na a'ʉmtʉsi e'a'ausna to hoolicu to moose ho ito h'omahsʉfta to eyongensa."
mhocni ci phingi
(luka 13:24)
7:13 "temula ohmi tomo mhocni ci phingi;
maica i'omo emo'usnu tote meaapayo'ʉ ci phingi mo faf'ohʉ,
ʉmnʉ ho isi mia 'o ceonʉsi,
'omo emo'usnu to ic'o ci cou mo maezo botngonʉ.
7:14 i'omo ptu'usnu tomo yaansou ci phingi mo mhocni,
na'no ngoveo 'o ceonʉ ho isi mia,
maezo kakutia 'ola elʉ ci cou."
evi ho i'o beahcisi
(luka 6:43-44)
7:15 "temu etngoeva 'o meyoyongensa.
la esmi ta tuhcumu,
ho isi aiti 'o yafanahe mais'a mo ma'cocacni ci moa'um'u,
'o 'ayumonahe zou eno'so pak'i ci av'uyʉn'ʉ.
7:16 temu peelʉi i'mi to lahe peipeis'ausna ho honga.
'o cʉcʉmʉ o'ate meelʉ beahci no amcuyu,
'o evi no cʉmʉ o'ate meelʉ beahci no moezunge.
7:17 'o ʉmnʉ ci evi la beahci tomo ʉmnʉ ci beahci;
'o kuici evi la beahci tomo kuzo ci beahci.
7:18 'omo ʉmnʉ ci evi o'ate beahci nomo kuzo ci beahci;
'omo kuici evi maezo o'ate beahci nomo ʉmnʉ ci beahci.
7:19 i'omo kuzo 'o beahcisi ci evi te teoca ho to'seni to puzu.
7:20 ko'koeno.
i'mi to lahe peipeis'ausna.
temucu peelʉi honga na meyoyongensa."
o'a os'o honga muu
(luka 13:25-27)
7:21 "i'o mo macicihi cila mi'usnu a'o ho mainca ""nooe'oca,
nooe'oca"" ci cou o'ates'a acʉhʉ meelʉ yʉmeʉmʉ to hpʉhpʉngʉ ne pepe;
'ai'olac'o peismi to 'tohʉngʉ to amopepe nate meelʉ yʉmeʉmʉ.
7:22 ho tena cmʉ'ho 'o puesona ta hie,
botngonʉ 'o tena mi'usnu a'o ho mainca:
""nooe'oca,
nooe'oca,
momzala boemi to ongkosu ho psoyaska 'o e'e to hamo,
maezo boemi to ongkosu ho peobanga 'o botngonʉ ci hicu,
hioa 'o man'i ci po'e.""
7:23 ho mio,
tena'u esansana eʉsvʉta:
""o'a o'ula ahta honga muu;
'elamu popeiskuzkuzo,
nahocu mongoi!"" "
yuso ci totnguca
(luka 6:47-49)
7:24 "ko'koeno,
namo afu'u tmalʉ ta e'e'u ho a'ʉmta peis'ofeihni,
te mais'a 'omo mau'to'tohʉngʉ ci cou isi p'eyac'a to yakivayʉ 'o emoosi;
7:25 'upena hoci ta'poepza,
tucvihi,
toemiza no fozu ci chumu,
o'ate ahtu oefʉ'ʉ 'e emoo,
maica homo yac'ʉ to yakivayʉ 'o isi i'tohungvi.
7:26 at'inghi,
'ola tmalʉ ta e'e'u ho o'te peis'ofeihni,
mo mais'a 'ola nongonongo ci cou isi p'eyac'a to efuefu'u 'o emoosi,
7:27 ho isicu ta'poepza,
tucvihi,
toemiza to fozu ci chumu,
cu oefʉ'ʉ 'o emoo,
a'vinano a'ʉmtʉ a'sʉftonʉ toczoyʉ!"
tonʉ to iesu
7:28 eepʉnga to iesu 'emo maica ci e'e,
mo acʉhʉ yamci to hiasi mo'ma'cohio 'omo botngonʉ ci cou;
7:29 maica o'amo totiski to lema'cohio seisohe 'o iesu,
'o hiasi mo'ma'cohio mo mahafo to tonʉ.
MATAI 8
aotothoma to iesu 'omo to'ho'ho ci cou
(maluko 1:40-45; luka 5:12-16)
8:1 mo i'mi to hcuyu 'o iesu ho toyovcu,
botngonʉ 'omo to'ofeihni ci cou.
8:2 panto cihi cimo tma'congo no to'ho'ho mo baito to iesu,
mi'usnu ho m'ohkuyu,
yainca:
"nooe'oca,
hociko'so maka mimha,
'ateko peelʉi poa cofkoya a'o."
8:3 isi ho'usneni to iesu 'o emucusi ho peuasa,
yainca:
"'ate'o mimha,
nahocu cofkoya!" 'o to'ho'hosi micu osni aapayo'ʉ,
cu cofkoya.
8:4 isicu mi'usni to iesu ho yainca:
"teav'a 'ahʉya eʉsvʉta no mocmo ci cou 'e hi'hioa eni,
yʉsngʉcʉ uhto saisi,
poa aitneni,
takocu maito h'oesvʉta to moose ho sʉ'tʉ,
mi'usnu tamo botngonʉ ho soomei ho mikocu cofkoya."
poa yov'o to iesu 'o soskuskunu to ngungkang to looma
(luka 7:1-10)
8:5 mo esmi ne kapenong 'o iesu,
panto cihi ci ngungkang to looma mo yungeou to iesu,
ho m'eya to'usni,
8:6 yainca:
"nooe'oca,
mo tma'congo no meupsu'hu 'o soskuskunu'u,
ho amiocni ne emoo,
la na'no 'atutumzo."
8:7 yainca to iesu:
"te'o usa ho aotothoma."
8:8 yut'ingi 'o ngungkang:
"nooe'oca,
hociko aʉlʉ iachi ohcʉ'ho ne emoo,
o'ate'o pasvo'ha;
hocikoc'o mako matnʉskʉ eucufnu,
'atec'ueno yov'o 'o soskuskunu'u.
8:9 mais'a a'o la yaa smuhnu a'o ci taicini,
ta puesona'u la'u yaa skuna ci heetai;
hoci'u pashʉi namo cihi ho poa uhne'e tec'u uhne'e,
hoci'u pashʉi namo cihi ho poa uhtan'e tee uhtan'e,
mi'usnu to soskuskunu ho yainca ""hioa eni"",
tasicu hioa."
8:10 talʉi to iesu 'e e'e eni,
mo na'no yamci,
cu mi'usnu tomo to'ofeihni ci cou ho yainca:
"te'o a'ʉmta eʉsvʉta muu,
'emo maica ci singkoo,
'upenaeno ta 'ayumona ta 'isolaelu,
uk'amocu ci os'o ahta yupteilʉneni.
8:11 te'o eʉsvʉta muu,
tena botngonʉ ci cou te i'mi ne esmomhana meoveana ho cmʉ'ho,
te yonto hpʉhpʉngʉ ne pepe ho suteuyunu 'o 'avulahamu,
'isaku,
yakovu ho toehungu eabobonʉ.
8:12 i'ontoho anana'o meelʉ tma'oko to hpʉhpʉngʉ ne pepe ci cou,
apuya popeo'usna tomo voecʉvcʉ ta yafana;
yonto ic'o,
mongsi ho sihsikiki."
8:13 ataveisi isi mi'usni to iesu 'o ngungkang ho yainca:
"nahocu maine'e,
maita singkoosu ho aepʉnga na koyusu!"
'o tma'congo to soskuskunusi mo aʉlʉ yov'o to tuhcusi ne mio.
aotothoma to iesu 'o tma'congo to botngonʉ ci cou
(maluko 1:29-34; luka 4:38-41)
8:14 mo uhto emoo to petelo 'o iesu,
aiti 'o ba'isi mo seolʉano na'no cuveu,
ho oevoi to hopo.
8:15 isi peuasa to iesu 'o emucusi,
cu tosvo cuveu,
micu osni yʉc'ʉ ho aʉt'ʉt'ʉca 'o iesu.
8:16 a'usnu no yofna,
panto cou cimo mahafo tomo 'enepio ci isi ti'eopi no hicu ci cou ho hafa baito to iesu.
moc'o matnʉskʉ 'o iesu isicu acʉha peteoyafa 'o hicu,
yaeza poa yov'o 'omo afu'u tma'congo ci cou.
8:17 homo maica 'o hioa to iesu isi aʉla mia 'o niala e'e to eyongensa ci 'izaya:
"isi sviei 'e yoz'uto,
ngoevi 'e tma'congoto."
nate to'ofeihni to iesu ci cou
(luka 9:57-62)
8:18 isi aiti to iesu 'o botngonʉ ci cou ho ihe paikuyungvi,
cu cucufni 'o tesi ho ohpihi ta apihana to etʉpʉ.
8:19 panto cihi ci lema'cohio seiso mo biebimi to iesu,
mi'usni 'o iesu ho yainca:
"sensei,
'upena hociko emo'usnu no nenu te'o asngʉcʉ to'ofeihni suu."
8:20 yainca to iesu:
"la yaa feongo 'o kuhku,
yaa sku'u 'o zomʉ,
at'inghi 'e okocou.
uk'a ci lasi maka otuevi."
8:21 panto mon'a cihi ci tesi mo mi'usnu to iesu ho yainca:
"nooe'oca.
poan'a maine'e a'o te'o soʉlʉlʉan'a 'o nia amo'u."
8:22 yainca to iesu:
"teko asno'zonʉ to'ofeihni a'o,
'ateheeno efo'a tomo mcoi ci cou namo mcoi ci cou!"
eususeoma to iesu 'o poepe ho smahu
(maluko 4:35-41; luka 8:22-25)
8:23 cu smopayo to 'apangʉ 'o iesu,
mo to'ofeihni 'o tesisi.
8:24 akameosʉ,
tucvihi ho ta'poepza 'o etʉpʉ,
mo smafeʉ'sʉ to 'apangʉ 'o smahu,
nama mo oengʉtʉ 'o iesu.
8:25 mo uhto iesu 'o tesi ho poecʉ'va,
yainca:
"nooe'oca,
to'usni a'mi.
temiacu mon'i mcoi!"
8:26 yut'inga to iesu:
"mainci maica ci hia ngoheʉngeʉ?
mo angu okosi co singkoomu!" micu yʉc'ʉ,
t'ʉtei 'o poepe ho i'o smahu,
cu amiocni 'o poepe ho i'o smahu.
8:27 mo acʉhʉ kuici yamci,
yupa mainca:
"ma atuhcu siyas'a na taini,
ci ac'ʉhʉ ta poepe ho smahu simo tmalʉ!"
poa yov'o 'omo yoso ci isi ti'eopi to hicu
(maluko 5:1-20; luka 8:26-39)
8:28 mo uhto mia'usnu ne katala to apihana to etʉpʉ 'o iesu,
lʉa 'omo i'mi to heuf'a ho yuyafo cimo yoso ci cou.
'emo yoso eni isi ti'eopi to hicu,
mo a'sʉftonʉ pak'i,
ko'koeno uk'a cila smeecʉ'ho mita ceonʉ tan'e.
8:29 ihe teolʉi 'o iesu,
osni moozoyʉ ho mainca:
"oko to hamo,
mainci 'afeo'fu'a a'mi?
o'amocu mo esmi na hiesi.
tekocun'asi uhtan'e ho poa 'atutumio a'mi?"
8:30 'oc'ocic'o,
to cum'usi pantomo eabobonʉ cimo botngonʉ ci feʉ'ʉ.
8:31 cu mi'usnu to iesu 'o hicu:
"hociko peteoyafa a'mi,
moeza peteo'usna ta botngonʉ ci feʉ'ʉ."
8:32 yainca to iesu:
"naho!" micu yuyafo 'o hicu,
yʉmeʉmʉ to feʉ'ʉ;
i'o botngonʉ ci feʉ'ʉ,
micu cono meipeohʉ to tʉ'nʉ,
su'to etʉpʉ hocu acʉhʉ engeosʉ ho mcoi.
8:33 'o le'aʉt'ʉcʉ feʉ'ʉ,
cu toekameosʉ ho p'usnu to hosa.
eʉsvʉsvʉta to botngonʉ 'e isi aiti ho i'o a'a'ausna to isi ti'eopi to hicu ci cou.
8:34 mo acʉhʉ yuyafo 'o cou ta cono hosa ho aiti 'o iesu,
ihecu aiti,
ihe mi'usni 'o iesu ho poa mongoi ta hupahe.
MATAI 9
poa yov'o to iesu 'omo meaupsu'hu ci cou
(maluko 2:1-12; luka 5:17-26)
9:1 smopayo to 'apangʉ 'o iesu,
ohpihi to etʉpʉ,
yuovei to iachisi hosa.
9:2 pantomo ngoe tomo oevoi to hopo cimo tma'congo no meaupsu'hu ci cou ho hafa uhto tuhcu to iesu.
isi honga to iesu 'o singkoohe,
cu mi'usni 'omo meaupsu'hu ho yainca:
"oko,
ma'cocoyʉ,
na kuisisu isicu peteongasa!"
9:3 piyo ci lema'cohio seiso ihe yainca no koyuhe:
"'e cou eni mo mo'engho tamo efnaso ci e'e!"
9:4 isi cohivi to iesu na koyuhe,
cu tuocosi:
"mainci mimu yaa kokuzo ci hia ma'to'tohʉngʉ?
9:5 nenusi nate sonʉhe hoci mi'usni 'e cou eni ho yainca ""isicu peteongasa na kuisisu"" hocieno yainca ""yʉc'ʉ ho coeconʉ""?
9:6 te'o mi'usnu muu ho soomei,
'e okocou mo yaa tonʉ no meteongaso no kuisi homo yonta ceoa." isicu mi'usni 'omo meaupsu'hu ci cou ho yainca:
"yʉc'ʉ,
hafa si hoposu hocu maine'e!"
9:7 micu yʉc'ʉ 'o cou ic'o ho maine'e.
9:8 mo acʉhʉ yamci ho ma'sasmoyo 'omo baito ci cou;
mo tohmomoengʉ to hamo,
maica ho isi pafeni ta cou 'emo maica ci tonʉ.
noa eoho'a 'o matai
(maluko 2:13-17; luka 5:27-32)
9:9 mongoi ne'e 'o iesu ho emosuhcu,
teolʉi 'omo cihi ci letmuhno,
zou matai 'o ongkosi,
yusuhngu to 'oyona tmuhno.
isi mi'usni to iesu ho yainca:
"uhtan'e ho to'ofeihni a'o!"
cu yʉc'ʉ 'o matai.
hocu to'ofeihni to iesu.
9:10 nemo yonto emoo to matai 'o iesu ho bonʉ,
'enepio ci letmuhno ho kuici cou mo maezo esmi,
mo toehungu eabobonʉ 'o iesu ho i'o tesisi.
9:11 ihecu aiti to piyo ci coufalisai.
cu mi'usnu to tesi to iesu ho yainca:
"mainci toehungneni bonʉ ta senseimu si letmuhno ho isi kuici cou?"
9:12 ne isi talʉi to iesu 'e e'e eni cu yainca:
"'omo yoayokeo ci cou,
o'ate poa baito to leaotothomʉ.
'ai'o lac'o tma'congo ci cou 'ola poa baito.
9:13 yainca to seiso:
""zou himcocoveoi 'o te'o p'enza,
o'as'a i'o sʉ'ta."" temu ta'to'tohʉngva na e'ausnasi tan'e!
maica na te'o atuhca hioa ho mi'o cmʉ'ho o'ate'o eyoho'a namo ʉmnʉ ci cou,
'ai'o moeno kuici cou 'o te'o eoho'a."
e'usnu no tanzi
(maluko 2:18-22; luka 5:33-39)
9:14 moso i'nʉskʉ.
mo uhto iesu 'o tesi to letoonono yohane ho tuocosi 'o iesu:
"na a'mi ho i'o coufalisai lamia asngʉcʉ tanzi,
mo mainci o'ala tanzi si tesisu?"
9:15 yut'inga to iesu:
"homon'a mai'upu tomo eabobonʉ 'o mon'a faeva mevcongʉ ci hahocngʉ,
teeno nac'o 'omo uso ho tooyokeo ci cou?
o'ate maica.
at'inghi ho tec'u esmi 'e hiesi,
ho tahe hafa mongoi 'o hahocngʉ,
ho mio tenac'u acʉhʉ tanzi.
9:16 "uk'a ci te mayo no mon'a faeva ci yʉteʉ ho tpihneni no micu noana'o ci yʉsʉ,
maica 'e mon'a faeva ci tpiha tasi eekieki 'o micu noana'o ci yʉsʉ,
ho poa asuhcu meoisi 'ote aekieki.
9:17 maezo uk'a cite mayo no faeva ci emi ho teapha no micu noana'o ci feo'u no tvoemia.
hoci maica tasi yuf'oi 'o tvoemia,
ho mhʉ'to 'o emi,
ac'ʉhʉ to tvoemia 'ote kuzo,
la teapha to faeva ci tvoemia 'o faeva ci emi;
hoci maica nianteno aepohʉ nongaco."
oko no mamespingi to le'aʉt'ʉcʉ kaitoo ho i'o mo tma'sʉpcʉ ci mamespingi
(maluko 5:21-43; luka 8:40-56)
9:18 ne isin'a seolʉa no aomotʉ'a to iesu 'o tesi to yohane,
panto cihi cila atuhcu aʉt'ʉcʉ to kaitoo mo uhto iesu,
yonto tuhcu to iesu ho pop'up'ungu,
yainca:
"'o okono'u mamespingi mon'a aʉlʉ mcoi,
teko'so usa ho hoe'oci,
poa i'vaho yaa nsoua."
9:19 mo yʉc'ʉ 'o iesu ho fiho;
maezo to'ofeihni 'o tesisi.
9:20 panto cihi ci mamespingi micu tomaska ueso hola tma'sʉpcʉ;
mo ohfaf'uhu to iesu,
ake'a peuasa 'o pepuehonʉ to yʉsʉ no aoskopa to iesu.
9:21 isi yainca no koyusi:
"hoci'u maka peuasa si pepuehonʉ ta yʉsʉsi,
'ate'o ahtu o'te yov'o."
9:22 mo miezuhu 'o iesu,
teolʉi 'e mamespingi,
cu mi'usni ho yainca:
"oko,
ma'cocoyʉcu,
isi to'usni ta singkoosu na suu!" aʉlʉ ne mio,
micu yov'o 'o tma'congo to mamespingi.
9:23 cu sʉc'ʉhʉ to emoo to le'aʉt'ʉcʉ kaitoo 'o iesu,
aiti 'ola lemeepeucu la'pa tola yamcoi ho i'omo yangaevi ci botngonʉ.
9:24 cu mi'usni to iesu ho yainca:
"temu acʉhʉ yuyafo,
o'amos'a mcoi 'e oko no mamespingi,
'amoc'o oengʉtʉ!"
ihe toehunga cocvi 'o iesu.
9:25 ataveisi ne isicu popeoyafa 'omo botngonʉ ci cou,
mo yʉmeʉmʉ to hopo to oko no mamespingi 'o iesu,
e'tʉi 'o emucusi,
micu yʉc'ʉ.
9:26 'e hi'hioa eni ihecu psoengaboa to mia'usnu to hpʉhpʉngʉ to ic'o.
poa yov'o 'o mo yoso ci bʉkngʉ
9:27 mo mongoi to ic'o 'o iesu,
i'vaho emosuhcu.
panto yoso ci bʉkngʉ mo to'ofeihni to iesu,
moozoyʉ mainca:
"oko to tavite,
coveoza a'mi!"
9:28 mo yʉmeʉmʉ to aemana 'o iesu,
uhto tuhcusi 'omo yoso ci bʉkngʉ,
isi tuocosi to iesu 'emo yoso:
"imu taa'uzva hoci'u peelʉi hioa eni?"
ihe yut'inga:
"nooe'oca.
'aimza taa'uzva."
9:29 isicu peuasa to iesu 'o mcoohe,
yainca:
"maita singkoomu ho poa yov'o muu."
9:30 micu yuovei bohngʉ.
isi bumemeala eutotaveiya to iesu:
"teav'a eʉsvʉta no mocmo ci cou 'e hi'hioa eni!"
9:31 at'inghi,
ne micu yuyafo ihec'o psoengaboa to mia'usnu to ic'o 'o isi hi'hioa to iesu.
aotothoma 'o tmusngʉsngʉ
9:32 ne micu yuyafo,
panto mo mahafo to isi ti'eopi no hicu cimo tmusngʉsngʉ ho uhto tuhcu to iesu.
9:33 ne isicu peteoyafa 'o hicu,
micu meelʉ ya'ei 'o cou ic'o.
acʉhʉ na'no yamci ho yainca:
"ta 'isolaelu,
o'a mocu mito ahtu auyu baito tamo maica ci hi'hioa."
9:34 at'inghi,
ihe yainca to coufalisai:
"ho mita meelʉ meya hicu 'amoc'oeno noe'ocʉ no honte no hicu."
ta'cingha to iesu 'e yatatiskova
9:35 mo smaikukuyungu to mahohosa mayoyou 'o iesu,
yonto makakaitoo ho mo'ma'cohio to cou,
psoyaska 'o fukuin to hpʉhpʉngʉ ne pepe,
a'vinano aotothoma 'o mav'ov'o ci tma'congo to cou.
9:36 ne isi aiti to iesu 'omo maobotngonʉ ci cou,
mo aot'ou 'o himcocoveoi ci 'tohʉngʉsi;
maica mo 'atutumio ho uk'a to'usnu.
mais'a 'ola uk'a le'aʉt'ʉcʉ ci moatʉ'nʉ.
9:37 isicu mi'usni 'o tesisi ho yainca:
"mo man'i 'ete tov'oha.
at'inghi mo angu kakutia 'emo yaahioa ci cou.
9:38 temu uhto tauke ta ezoyʉ,
m'eya popeosmuhnu no soskuskunu ho a'pʉ'pʉya 'e isi tov'oha."
MATAI 10
maskʉ ueso ci sitoo
(maluko 3:13-19; luka 6:12-16)
10:1 isi eteuyuna to iesu 'o maskʉ ueso ci tesi ho noteuyuneni,
pafi to tonʉ no meya hicu ho tonʉ no aotothomʉ to mo mav'ov'o ci tma'congo.
10:2 'e oi'isi zou ongko to maskʉ ueso ci sitoo:
ahoisi zou saimong (zou petelo 'o tos'ongkasi),
i'ocu ohaesasi ci 'antole,
oko to sipitai ci yakovu,
ohaesa to yakovu ci yohane,
10:3 fuili,
patolomai,
tomas,
letmuhno ci matai,
oko to 'alofui ci yakovu,
taathai,
10:4 'o saimong to nesintoo,
ho i'o moso himhohioa ho phieni 'o iesu ci coukaleo ci yuta.
tovei 'o maskʉ ueso ci sitoo
(maluko 6:7-13; luka 9:1-6)
10:5 popeoskuna to iesu 'emo maskʉ ueso ci cou ho yuyafo,
isi eucucufna:
"'ote uhto hupa to couyafana,
maezo 'ote yʉmeʉmʉ to hosa to cousamalia.
10:6 temu uhto 'ayumona tomo eapayo'ʉ ci moatʉ'nʉ to 'isolaelu.
10:7 ina te afu'a sʉc'ʉhi la epeaska:
""tec'u mon'i esmi 'o hpʉhpʉngʉ ne pepe!""
10:8 temu aotothoma 'omo tma'congo,
poa smoevovei 'omo mcoi,
poa cofkoya 'omo to'ho'ho,
peobanga 'o hicu.
mimu tmaha'o,
temu yaeza taha'veni.
10:9 'o tvopeisua teav'a teaphi no peisu no king,
nging,
ho too;
10:10 yuyafo to phingi 'ote smukeʉpʉ hocieno e'echi no yʉsʉ,
maezo 'ote mahafo no sapiei ho s'ofʉ.
maica 'e leyaahioa 'anteeno anana'o elʉ no tehe tititha.
10:11 "ho temu sʉc'ʉhʉ nomo conci hosa hocieno cono you,
la auyun'a tmotmalʉ siya nate smoekaebʉ no aʉt'ʉcʉ muu,
tamucu no'upu no emoosi,
ac'ʉhʉ ho tamucu mongoi to ic'o.
10:12 hocimu yʉmeʉmʉ tamo conci emoo.
temu yainca:
""temu'sola soanono.""
10:13 hocihe tiova tamo cono emoo tan'e na muu,
'e imu p'enzeni ci soanono te cmʉ'ho ta cono emoo tan'e.
hocihe o'te tiova muu,
te tasvoveiya na tooyokeomu.
10:14 namo o'te tiou muu,
o'te tmalʉ no e'emu ci cono emoo hocieno hosa,
temu mongoi to ic'o,
topsʉpseni na yompuhu ta caphʉmu.
10:15 te'o a'ʉmta eʉsvʉta muu,
to hiesi no yʉsvʉtʉ,
ina ohela elʉa to sotoma ho 'omola ci patvovei maten'a sop'ohe ta tehe elʉa to yane'e!"
akuzkuzo ho noana'o
(maluko 13:9-13; luka 21:12-17)
10:16 "la bumemealʉ,
ho os'o popeoskuna muu ho poa yuyafo.
aʉlʉ mais'a moatʉ'nʉ ci isi popeo'usna to 'ayumona to av'u yʉn'ʉ.
temula mais'a fkoi na hia yoefʉhta,
mais'a hofoyu na hia ma'cocacni.
10:17 bumemealʉ'sio,
panto te tʉtpʉtʉ muu.
e'usna to hooin na muu,
yonto kaitoohe ho ti'usna muu.
10:18 nomio a'o,
tenahe e'usna to le'aʉt'ʉcʉ ho ito tuhcu to honte na muu ho tuucocosi,
tamu mi'usnu to le'aʉt'ʉcʉ ho honte ho ito couyafana ho 'akasi 'e fukuin.
10:19 ho tahe tuucocosi muu,
'ote ma'tipvongʉ no cuma nate e'e hocieno te mainenu nate hia yut'ingi;
ho mio.
'o hamo tasi pas'ofeihni no tamu pat'a'ausna.
10:20 maica ina maee'emu,
o'as'a iachimu e'e,
ma i'o piepiya to hamo tesi ieni muu ho ya'ei.
10:21 "'o nat'ohaesa te yupa mhino,
po'usna no mcoi;
'o amohe hote mi'usnu to 'o'oko teec'o maezo maica;
te yu'hango to maameoi 'o 'o'oko,
a'vinano amcoza akuzkuzoa.
10:22 nomio a'o,
tehe sʉ'nova tamo botngonʉ na muu;
at'inghi i'ote apaezumo buveici ci cou 'ate ahtuo'te elʉ no to'usni.
10:23 ho tehe akuzkuzoa ta hosa tan'e muu,
temu p'usnu to zocni hosa.
te'o eʉsvʉta muu,
ho o'amocu temu saingaboa 'e mahohosa ta 'isolaelu,
tec'u cmʉ'ho 'o okocou.
10:24 "'o seito o'ate yuepehe no sensei,
na soskuskunu o'ate yuepehe no tauke.
10:25 ko'koeno,
na tesi elʉa ta seito te totiski to sensei,
na isi elʉa to soskuskunu,
te totiski to tauke.
hocic'u maica.
'antec'u ma'mamso.
hoci noa yainca na tauke ta cono emoo zou honte no 'akuma ci pesipu,
na mocmo ci 'oahngʉ tamo cono emoo 'ates'aeno tiou no meoino no aokoe'iya?"
siya nante a'ʉmta smoyoa
(luka 12:2-7)
10:26 "ko'koeno,
'ote smoyo ta cou,
'ola afu'a efʉefʉnga ci hi'hioa la ahtao'te eyafa,
'ola auc'oc'ova ci hi'hioa te yaeza epopayoa.
10:27 'e os'o auc'oc'ova eʉsvʉta muu,
tamula ebohta epopayoa ta tiskova;
'e imu taafeozi ci e'e,
te yaeza psoevaha tamo botngonʉ.
10:28 na tec'o opcoi ta feango ho o'te peelʉi pot'upa na piepiya,
o'ate 'ahʉya smoyoa;
la smoyoa 'o hamo,
'ai'oc'oeno hamo nate meelʉ opcoi ta feango ho pot'upa na piepiya ho to'seni ne vooecʉvcana.
10:29 i'omo yuso ci uhngu e'vono tec'o psuv'ohi nomo coni ci oko no peisu,
at'inghi hocisi o'te teomneni to amomu pepe,
o'a tes'a mako coni nate supeohʉ ta ceoa.
10:30 inacu muu,
ac'ʉhʉ ta f'ʉsʉmu.
ohcu yaeza acʉha spʉya.
10:31 ko'koeno,
'ote ngoheʉngeʉ,
mimu na'no pepehe tomo 'enepio ci uhngu!"
ebobohngʉ to kilisto
(luka 12:8-9)
10:32 "inate yono tuhcu ta cou ho ebobohngʉ a'o,
te'o yaeza ehohonga ho ta'u mi'usnu to amo'u pepe;
10:33 inate yono tuhcu ta cou ho o'te ebobohngʉ a'o.
ta'u yaeza o'te ehohonga ho ta'u mi'usnu to amo'u pepe."
o'as'a suseomʉ, zou poyave
(luka 12:51-53;
14:26-27)
10:34 "teav'a ta'unano te'o mahafo no moususeomʉ ho mi'o cmʉ'ho ta hpʉhpʉngʉ;
ma'i te'o hafneni no moususeomʉ,
ma os'o hafneni no tiopoyave.
10:35 ho mi'o cmʉ'ho te poa yu'hango ta amosi 'e oko,
yu'hango ta inosi 'e oko no mamespingi,
yu'hango ta ba'isi 'o oko nosi cou.
10:36 na hangʉ ta cou.
'ai'eeno cou ta iachisi cono aemana.
10:37 "na himngonghi no maameoi hoci tosa'ohe no ngohia a'o,
o'ate 'aseolʉ hoci to'ofeihni a'o;
na himngonghi no 'o'oko hoci tosa'ohe no ngohia a'o,
o'ate 'aseolʉ hoci to'ofeihni a'o;
10:38 inala o'te mimha ngoevi na iachi zuuzika ho m'e'ofeihni ta caphʉ'u,
maezo o'ate 'aseolʉ hoci to'ofeihni a'o.
10:39 i'ola 'ucia iachia tʉyʉcʉ na nsou,
te apuya payo'a na nsou;
i'ola nomio a'o ho payo'a na nsou,
te apuyu elʉ no nsou."
e'usnu no tohnoi
(maluko 9:41)
10:40 "siya namo aʉt'ʉt'ʉcʉ muu 'aisieno aʉt'ʉt'ʉca a'o;
namo aʉt'ʉt'ʉcʉ a'o.
'aisieno aʉt'ʉt'ʉca 'omo popeosmuhnu a'o ci ic'o.
10:41 nomio ho zou'so soskuskunu to hamo namo cihi ho aʉt'ʉt'ʉca,
'ate ahtuo'te tma'upu no tasi hnoo no soskuskunu;
nomzo ho zou'so coumoulʉlʉ ho aʉt'ʉca,
'ate ahtuo'te tma'upu no hnoo no coumoulʉlʉ.
10:42 te'o a'ʉmta eʉsvʉta muu,
'upena na siya,
hocic'o mayo no cono sooetohva ci coheʉceʉ ci chumu ho pemneni nomo so'okosia ci cou,
c'o nomio no ho zou'so tesi'u na ic'o,
te ahtuo'te mayo no hnoo."
MATAI 11
biebimi to iesu 'o tesi to yohane
(luka 7:18-35)
11:1 cu pateʉpnga to iesu 'o isi pas'ofeihneni to maskʉ ueso ci tesi,
micu mongoi to ic'o,
emo'cʉ'cʉnʉ uhto cum'u ci mayoyou ho mo'ma'cohio to cou ho psoyaski to fukuin.
11:2 'o letoonono ci yohane isi tac'ʉhi nemo yonto poo'usna 'omo natʉ'ca 'o kilisto ci hi'hioa,
cu popeosmuhnu to tesisi ho baito to iesu,
11:3 tuocosi:
"zou suu na ohsila engha to yohane cite cmʉ'ho ci ic'o?
hocieno temian'a mooteo nomo h'unasi cimo cihi?"
11:4 yut'inga to iesu:
"temu yuovei,
eʉsvʉta to yohane na imu afu'a talʉi,
afu'a aiti,
11:5 'aeno:
mo bohngʉ 'omo bʉkngʉ,
coeconʉ 'omo pi'o,
cofkoya 'omo to'ho'ho,
tmalʉ 'omo loʉngʉ,
smoevovei 'omo mcoi,
tmac'ʉhʉ to fukuin 'omo thi'cia.
11:6 i'o o'ala ma'pepecvai a'o ci cou mainenu na hia ʉm'ʉmnʉ!"
11:7 ataveisi ne micu e'ohʉ 'o tesi to yohane.
micu mi'usnu to botngonʉ 'o iesu ho engha 'o yohane.
yainca:
"ne auyusi mohmula uhne maepuepuhu ho biebimi to yohane,
zou cuma na ohmu 'ucia aiti?
zou 'o isi peaot'ova to poepe ci yohu?
11:8 cuma na temus'a atuhca hioa ho mimu yuyafo?
zou baito tola 'ukini 'o yʉsʉ ci cou?
'ola maceofʉ tamo maica ci yʉsʉ.
la yonto emoo to honte.
11:9 hoci maica,
ho mimu yuyafo cuma na temu aiti?
baito no eyongensa?
'aeno zou,
at'inghi te'o eʉsvʉta muu,
'o yohane mo meoisihe to eyongensa.
11:10 'ai'o isieno engha to seiso cimo cihi ci ic'o.
yainca to hamo:
""aiti,
te'o popeoskuna 'o soskuskunu'u ho papoevʉ suu;
tesi ptuceoneni suu.""
11:11 te'o a'ʉmta eʉsvʉta muu,
ta yatatiskova.
uk'a cimo meoisihe to yohane,
at'inghi to hpʉhpʉngʉ ne pepe,
'omo so'okosia cimo cihi mion'a meoisihe to yohane!
11:12 ahoi to letoonono yohane ho psoyaska 'e fukuin ac'ʉhʉ maitan'e,
'o hpʉhpʉngʉ ne pepe la a'ʉmta 'aanana'veni mi'usni,
'omo pak'i ci cou lahe ta'koeva no ti'einga.
11:13 ac'ʉhʉ to yohane,
'o afu'u tposʉ to eyongensa ho i'o hoolicu to moose isi acʉha engha na hi'hioa no hpʉhpʉngʉ ne pepe;
11:14 hocimu mimha tiova 'e ohela eyoca,
'o yohane 'aeno 'ote cmʉ'ho ci 'iliya.
11:15 namo yaa koyua,
acʉhʉ'so tmalʉ!
11:16 "i'ecu cou ta hpʉhpʉngʉ maitan'e,
te'o mayo no cuma ho patotiska?
mo aʉlʉ mais'a 'ola peispak'i ta papae'ohsa ci 'o'oko,
ihe zozoya 'omo noh'unu ho yainca:
11:17 ""mimza pasumevcongʉ.
o'a mimu 'otole.
mimza pasuyamcoi.
maezo o'amimu h'unano mongsi!""
11:18 mo esmi 'o yohane,
la o'te bonʉ o'te mimo,
la toehunga yainca:
""ma isi ti'eopi no hicu!""
11:19 cmʉ'ho 'o okocou,
la mimo ho eabobonʉ,
lahe toehunga yainca:
""mamita voemi ho meaesi ci cou,
conino eananghia to letmuhno ho ito kuici cou!"" at'inghi,
na moutʉs'ʉ to hamo la hupopayoi to beahci to moutʉs'ʉsi."
o'te tmaa'uzo ci hosa
(luka 10:13-15)
11:20 ne mio,
isi koica to iesu 'o mosola baito to man'i ci po'esi ci hosa,
maica 'o hpʉhpʉngʉ to ic'o uk'a cimo ma'vovei.
11:21 isi yainca:
"kolasin,
tekocu ku'kuici!
posaita, tekocu ku'kuici!
'e o'u hioa ta taicomu ci po'e hoci o'u hioa ne tailo ho ine saitong,
i'o cou ne'e matec'u noana'o iachi sisava ho tomfu,
pa'teni na hiahe ciha na kokuzo hocu peihtuhcu.
11:22 te'o a'ʉmta eʉsvʉta muu.
no hiesi no yʉsvʉtʉ.
'o ohe elʉa to tailo ho saitong ci patvovei mamon'a sop'ohe ta temu elʉa!
11:23 inacu'so suu,
kapenong,
tekon'asi hoepzeni si iachi?
mateko noa to'seni ne vooecʉvcana!
i'e os'o hioa ta lamu yoni ci po'e,
hoci o'u hioa ne sotoma,
'antoho ahtuo'te noc'ʉhʉ maitan'e!
11:24 te'o ivaha eʉsvʉta muu,
ho tena hiesi no yʉsvʉta,
'e ohe esmiza to sotoma ci patvovei maten'a sop'ohe ta temu esmiza!"
uso a'o
(luka 10:21-22)
11:25 ne mio,
yainca to iesu:
"amopepe,
nooe'oca ta pepe ho ceoa,
te'o to'aveoveoyʉ suu;
maica 'e ohsula efʉefʉnga tamo mau'to'tohʉngʉ,
ho motposʉ ci hi'hioa,
osko paavneni ta o'amo motposʉ ci cou.
11:26 'aeno a'ʉmtʉ,
amopepe,
'emo maica ci matoyange mo acʉhʉ i'mi no yonghu ci koyusu!
11:27 "'o amo'u isicu acʉha faeni a'o 'e acʉcʉhʉ.
tapeoha 'o amo'u,
uk'a cimo bohngʉ ta oko;
tapeoha 'o oko ho inaisi 'ucia paavi ci cou,
maezo uk'a cite bohngʉ to amo.
11:28 "uhtan'e,
namo afu'u peisngoseo,
e'ecvʉhʉ ci cou acʉhʉ uso a'o!
te'o poa elʉ no soanono muu.
11:29 temu ngov'eni 'e ngotohva'u.
momaemaezo a'o,
maica 'e 'tohʉngʉ'u mo ma'cocacni ho ma'einu.
maicac'o,
temucu meelʉ elʉ no soanono.
11:30 mo sonʉ ho isi ngov'eni 'e ngotohva'u;
mo sop'o ho isi hafa 'e hiafa'u."
MATAI 12
e'usnu no 'ansokunici
(maluko 2:23-28; luka 6:1-5)
12:1 o'a moso noana'o,
mo mito heoheome 'o iesu nemo 'ansokunici.
cu sieo 'o tesisi,
micu tu'susuecu to piyo ci mcuu to heome ho ana.
12:2 panto piyo ci coufalisai ihe teolʉi,
mi'usnu to iesu ho yainca:
"aiti,
ihe hioa ta tesisu si o'ante hioa homo 'ansokunici!"
12:3 yut'inga to iesu:
"'o tavite ho i'o fafeifeihasi ne moso sieo cuma na ohe hioa,
o'a ohmulaeno ahta engha?
12:4 moso yʉmeʉmʉ to seiten to hamo,
toehungu 'o fafeifeihasi ho bonʉ to isi sʉ'teni to hamo ci pang;
mamo yuszozʉ no hoolicu na eni (maica 'o pang ic'o i'oc'o saisi 'ote meelʉ bonʉ).
12:5 o'a ohmulaeno ahtacu engha 'o isi tposi to hoolicu to moose?
cono hola 'ansokunici,
holahe yuszoza to saisi 'ola 'ofifiha to seiten,
o'ala tamza no yaa kuisia.
12:6 te'o eʉsvʉta muu,
ta seiten tan'e panto isi asuhcahe huecvʉhʉa.
12:7 yainca to seiso:
""i'o te'o p'enia zou moma'cocacni.
o'as'a i'o isi sʉ'teni ci snoecavʉ."" hocimu a'ʉmta cohivi na e'ausnasi ta e'e tan'e.
o'a temu aha'va tobohti no kuisi 'e cou.
12:8 maica 'e okocou zou nooe'oca ta 'ansokunici."
aotothoma 'omo yu'oemi'mi 'o emucusi
(maluko 3:1-6; luka 6:6-11)
12:9 cu mongoi to ic'o 'o iesu,
uhto kaitoo to couyutaya.
12:10 to ic'o panto cihi ci cou,
mo yu'oemi'mi 'o coni to emucusi.
panto piyo ci cou ihe 'ucia i'ima namo o'te emio to iesu,
cu tuocosi 'o iesu:
"hoci aotothomʉ no tma'congo homo 'ansokunici teenana yuszozʉ no hoolicu?"
12:11 yut'inga to iesu:
"ta taicomu hoci panomo yaa conci moatʉ'nʉ,
'e moatʉ'nʉ eni mo suoyo no feongo homo 'ansokunici,
tee yainenu?
o'a tesis'aeno esifova na moatʉ'nʉ?
12:12 mamo tosa'ohe no moatʉ'nʉ 'e cou!
ko'koeno, isi teomneni to hoolicu hoci peis'ʉ'ʉmnʉ homo 'ansokunici."
12:13 isicu mi'usni to iesu 'o ic'o ho yainca:
"hoʉsʉzneni si emucu!"
ne isi hoʉsʉzneni.
micu yuovei ʉmnʉ.
totiski to ciengonasi.
12:14 mo emoyafo 'o coufalisai.
ta'koeva no mi'usni 'o iesu.
tehe 'ucia opcoza.
epeiya to hamo ci soskuskunu
12:15 isi tac'ʉhi to iesu na eni,
cu mongoi to ic'o,
botngonʉ ci cou mo to'ofeihni to iesu.
isi aotothoma to iesu 'o afu'uhe tma'congo,
12:16 isi eutotaveiya ho o'te epeaska na eni.
12:17 na eni isi aʉla mia 'o ohsila engha to eyongensa 'izaya:
12:18 aiti,
na taini zou os'o epeiya ci soskuskunu;
la'u ngohia ho ʉm'ʉmnʉa.
te'o pafeni taini 'o piepiya'u;
teta mi'usnu ta yatatiskova ho psoecʉ'ha 'o yʉsvʉtʉ'u.
12:19 o'a lata ehcʉvho,
o'ala yangaevi.
maezo o'ala yonta papae'ohsa ho moozoyʉ.
12:20 'o isi peololongi ci yohu,
o'a isi abkoca;
'e tec'u afsi ci sotiskova,
o'a isi peefsusi.
mo ma'tʉkcʉ to moulʉlʉ,
ac'ʉhʉ ho tac'u atpʉtʉ 'o moulʉlʉ.
12:21 'e yatatiskova ta mauhpʉhpʉngʉ
te acʉha toveineni ta feangosi nala ta'usni!
iesu ho i'o pesipu
(maluko 3:20-30; luka 11:14-23)
12:22 tuhcusi ne mio,
panto mo mahafo to isi ti'eopi no hicu.
mo bʉkngʉ,
tmusngʉsngʉ ci cou.
ihe hafa uhto tuhcu to iesu,
isi aotothoma to iesu,
poa meelʉ i'vaho ya'ei ho maezo meelʉ bohngʉ.
12:23 mo acʉhʉ na'no yamci 'o botngonʉ,
yainca:
"zoun'asiso a'ʉmtʉ taini na isi yainca oko to tavite?"
12:24 ne ihe talʉi to coufalisai 'e e'e eni cu yainca:
"ho mita meelʉ meobango to hicu.
'amoc'o noe'ocʉ no pesipu ci honte no hicu."
12:25 isi cohivi to iesu cuma na ihe ta'to'tohʉngva,
cu mi'usni ho yainca:
"na afu'u hpʉhpʉngʉ hoci iachi youbobai,
'ate ahtuo'te suhcʉhcʉ;
'emo cono emoo cono hosa hoci youbobai,
maezo ahtuo'te auz'oz'o.
12:26 hoci peobanga no satan na satan,
'amoeno iachi youbobai.
na hpʉhpʉngʉsi,
te mainenu hoci meelʉ biʉlʉlʉ?
12:27 hoci'u noe'ocʉ no pesipu ho mi'o meobango ta hicu,
hola meya hicu 'o tesimu,
mamoeno noe'ocʉ no siya?
'aisicueno soomei ta tesimu ho mimu o'te emio.
12:28 hoci'u noe'ocʉ to piepiya to hamo ho meya hicu,
'aiscueno soomei tan'e micu yonta taicomu na hpʉhpʉngʉ to hamo.
12:29 "panonte meelʉ yʉmeʉmʉ no emoo no maotano ho ti'eingi no yupasʉsi?
mac'ocisi aueva seo'eisi na maotano niante meelʉ ti'eingi no emoosi.
12:30 "namo o'te to'upu a'o,
'amoeno yu'hango a'o;
namo o'te i'upu a'o ho a'pʉ'pʉyʉ,
'amoeno atfʉngʉ eemo'ʉ.
12:31 ko'koeno,
te'o eʉsvʉta muu,
inala afu'a hioa ci kuisi ta cou ho inala boevovoyo ci e'e teen'a peelʉi peteongasa;
at'inghi i'ola boevovoyo to seilei ci cou.
o'ate peelʉi peteongasa.
12:32 inala ya'ei ho akvo'ʉ to oko cou ten'a peelʉi peteongasa;
at'inghi hoci boevovoyo to seilei.
'upenaeno maitan'e hocieno ho noana'o,
o'ate ahta peelʉi peteongasa."
evi ho i'o beahci
(luka 6:43-45)
12:33 "hoci ʉmnʉ na evi,
te ʉmnʉ 'o beahci;
hoci kuzo na evi,
te maezo kuzo 'o beahci.
te humzi to beahcisi ho honga na hiasi ʉmnʉ to evisi.
12:34 'e mimu mahiz'o ci fkoi.
mimu anana'o kokuzo.
tees'aeno ahtu meelʉ mo'engho nomo ʉmnʉ ci e'e?
maica inala nongcʉngcʉ no 'tohʉngʉ.
tena pateafa ta ngayo.
12:35 'omo ʉmnʉ ci cou la i'mi to isi a'pʉ'pʉya ci ʉmnʉ ho peiseafi 'omo ʉmnʉ;
'omo kuici cou.
la i'mi to isi a'pʉ'pʉya ci kuzo ho peiseafi 'omo kuzo.
12:36 "te'o eʉsvʉta muu,
no hiesi no yʉsvʉtʉ,
i'o ohola uusumsua tamo macicihi ci e'e tena acʉha tuyafa.
12:37 maica,
'o hamo tasila ieni ta nia iachisu e'e ho eʉsvʉta na hiasu yaa kuisi,
tesi yaeza ieni ta nia iachisu e'e ho eʉsvʉta na hiasu uk'a kuisi."
m'eya baito no po'e
(maluko 8:11-12; luka 11:29-32)
12:38 ne mio,
panto piyo ci lema'cohio seiso ho coufalisai mo esmi ho mi'usnu to iesu ho yainca:
"sensei.
imza tata'za hociko peispopo'e ho poa aitneni a'mi." yainca to iesu:
12:39 "'e cou maitan'e mo mainenu na hia kokuzo,
ho 'oha meot'ʉt'ʉcʉ!
mimun'aso mi'usnu a'o ho mici m'eya baito no po'e!
mao'a, tapeoha 'o nia po'e to eyongensa ci yoona,
uk'anaci te i'vaha pa'teni muu ci po'e.
12:40 'o yoona moso tuyu no hie ho tuyu no feʉngna to cfu'o to meoino yoskʉ,
'e okocou hote yonto mʉ'eona ta ceoa tena maezo tuyu no hie ho tuyu no feʉngna.
12:41 to hiesi no yʉsvʉtʉ,
'o couninive tena yʉc'ʉ ho ehpʉngneni 'e cou maitan'e,
maica ne ohecu talʉi 'o e'e to yoona mohcu acʉhʉ ma'vovei ho yuovei peislʉlʉ.
te'o eʉsvʉta muu,
ta tan'e panto mon'a meoisihe to hi'hioa to yoona!
12:42 to hiesi no yʉsvʉtʉ,
'o honte no mamespingi ne oi'ana,
tena yʉc'ʉ ho ehpʉngneni 'e cou maitan'e.
maica homo smaina'o ho 'ahʉyʉ tmac'ʉhʉ to moutʉs'ʉ ci e'e to solomong,
te'o eʉsvʉta muu,
ta tan'e.
panto mon'a meoisihe to solomong ci hi'hioa!"
yuovei 'o h'aokuv'o
(luka 11:24-26)
12:43 "'o h'aokuv'o cu mongoi to isi ti'eopi ci cou,
smaingabo to keolo ci hpʉhpʉngʉ,
biebimi no tesi yoni amiocni,
o'a mo ahtu elʉ,
12:44 cu yainca:
""ma te'o yuovei to os'o anana'va yoni ci emoo."" ne micu yuovei,
aiti 'o emoo mo uk'a yayo,
a'vinano oho tusi'nga hocu cofkoya ho suce.
12:45 micu i'vaho yuyafo,
e'vovei to pitu cimo kuzohe ta iachi ci h'aokuv'o,
micu no'upu noteuyunu.
maicac'o 'o atavei a'a'ausna to cou ic'o mo kuzohe ne auyusi.
'e a'a'ausna ta cou ta kuici hpʉhpʉngʉ maitan'e 'amoeno maezo maica."
ino to iesu ho i'o nanat'ot'ohaesasi
(maluko 3:31-35; luka 8:19-21)
12:46 ne mon'a seolʉa no aomotʉ'ʉ to botngonʉ 'o iesu,
mo esmi 'o inosi ho i'o nat'ohaesasi,
mo yac'ʉ to yafana te mici aomotʉ'ʉ to iesu.
12:47 panto mo eʉsvʉtʉ to iesu:
"'oe,
mo yac'ʉ ta yafana 'o inosu ho i'o nat'ohaesasu,
mate mici aomotʉ'ʉ suu!"
12:48 yut'inga to iesu:
"siya na ino'u?
siya na nat'ohaesa'u?"
12:49 isicu pas'osi 'o tesisi ho yainca:
"temu aiti,
'emo maica ci cou 'aeno ino'u,
nat'ohaesa'u!
12:50 namo afu'u mee'ofeihni no 'tohʉngʉ to amo'u pepe,
'acueno nat'ohaesa'u,
ho ino'u."
MATAI 13
epo'usa no miyapo
(maluko 4:1-9; luka 8:4-8)
13:1 conoc'o hie,
mo mongoi to emoo 'o iesu,
uhto aaskiti to etʉpʉ,
mo yusuhngu 'o iesu,
13:2 mo yu'eteuyunu to tuhcusi 'o botngonʉ ci cou,
ko'koeno mo bohsifou tomo conci 'apangʉ,
cu yusuhngu;
mo biaskiti to chumu 'o botngonʉ ci cou.
13:3 mo boemi to epo'usa ho esansana 'omo man'i ci hi'hioa.
isi yainca:
"panto cihi cimo miyapo to tutu mo yuyafo ho yapneni 'o tutu.
13:4 ne isi yapneni,
piyo ci tutu mo suaskiti to ceonʉ,
isi mei'usni to zomʉ ho ana.
13:5 piyo 'omo su'to mo 'oha ceoceoa ci yuyu'eo,
maica ho o'amo mʉ'eona 'o ceoasi,
mo na'no mon'i cmʉfeʉ;
13:6 at'inghi ne micu hie,
cu hikeololva 'o cʉfeʉsi;
maica ho o'a mo bimsʉ'eonʉ 'o emisisi,
micu oemi'mi.
13:7 panto mo sutaico to cʉcʉmʉ,
ne micu cmʉfeʉ 'o cʉmʉ,
isicu ta'poe'i 'o cʉfeʉ.
13:8 panto tutu cimo su'to mo ʉmnʉ 'o ceoasi,
micu yʉʉlʉlʉ ho beahci,
'o isi tov'oha pantomo se'conza,
pantomo monmʉhʉ,
panto mo mtuehu."
13:9 isicu yainca to iesu:
"namo yaa koyua,
acʉhʉ'so tmalʉ!"
atuhcusi ta epo'uso
(maluko 4:10-12; luka 8:9-10)
13:10 mo uhto iesu 'o tesi.
tuocosi 'o iesu:
"ho miko mi'usnu tamo botngonʉ ho aomotʉ'ʉ mainci acʉhʉ titho to epo'usa?"
13:11 yut'inga to iesu:
"e'usna no mau'to'tohʉngʉ no moumsʉ'eonʉ no hpʉhpʉngʉ ne pepe isicu pafeni muu,
o'aisi faeni tamo botngonʉ.
13:12 maica i'o micu afu'u pano,
te fii tomo asuhcu man'i,
poa atngaso ho yaa ang'osʉa;
i'omo afu'u uk'a,
te tas'upa 'o nian'a ake'isi ho yaeza ti'einga.
13:13 nomio tan'e,
mi'o boemi ta epo'usa ho mi'usnu ta botngonʉ ho aomotʉ'ʉ;
maica 'emo botngonʉ la aiti ho o'te honga,
talʉi ho o'te ta'hongi,
yaeza o'te asansana.
13:14 'o ohsila eyoca to 'izaya aʉlʉ mita feango hin'i;
isi yainca:
'e yatatiskova eni la siho siho tmalʉ,
o'a mo mako tma'hongʉ;
siho siho aiti,
o'a isic'o honga.
13:15 maica mo amʉtʉ 'o 'tohʉngʉhe.
sngʉsnga 'o koyuhe,
m'oyʉcʉ 'o mcoohe,
hoci o'te maica,
tec'u bohngʉ 'o mcoohe.
maezo tmalʉ 'o koyuhe,
ma'sansano 'o 'tohʉngʉhe ho ma'vovei,
te'ocu poa yov'o na hin'i.
13:16 "at'inghi mimu ʉm'ʉmnʉ!
maica mo smo'eʉc'ʉhʉ si mcoomu,
tmac'ʉhʉ si koyumu.
13:17 te'o a'ʉmta eʉsvʉta muu,
mo botngonʉ ci eyongensa ho i'o taotofsi'i ci cou ohela 'ucia aiti 'e imu aiti,
o'a ohe so'eʉc'ʉha;
'ucia talʉi 'e imu talʉi,
o'a ohe tac'ʉhi."
esansana 'e epo'usa no miyapo
(maluko 4:13-20; luka 8:11-15)
13:18 "ko'koeno,
temu asansana 'e e'ausna ta epo'usa no miyapo.
13:19 namo tmalʉ no e'e no hpʉhpʉngʉ ne pepe ho o'te tma'hongʉ ci cou aʉlʉ mais'a 'o tutu mo suaskiti to ceonʉ,
mo esmi 'o kokuzo,
cu acʉha ti'einga 'o oho yapneni to 'tohʉngʉsi ci e'e.
13:20 i'o mo su'to yuyu'eo ci tutu,
isi pas'usna ta cou hola tmalʉ to e'e.
la osni smoekaebʉ ho tiova,
13:21 at'inghi o'amo bimsʉ'eonʉ 'o emisisi,
o'ala meelʉ bina'o,
hoci nomio ta e'e ho elʉ no ngoveo hocieno pohtutumza,
la osnia teongasi.
13:22 i'o isi yapneni to cʉcʉmʉ ci tutu.
isi pas'usna tola tmalʉ to e'e,
la ma'tipvongʉ no h'oyunsova.
eepecvazi no mici yuyupasʉ hocu timcoza na ntohsi nsou ta e'e.
'anamo meelʉ beahci.
13:23 i'o isi yapneni tomo ʉmnʉ 'o ceoasi ci tutu isi pas'usna ta cou homo tmalʉ ta e'e,
a'vinano ta'hongi;
micu beahci,
'o isi tov'oha pantola se'conza 'omo apuhngu,
pantola monmʉhʉ 'omo apuhngu,
pantola mtuehu 'omo apuhngu."
epo'usa no paihicu
13:24 isi mi'usni to iesu ho mo'engho tomo h'unasi ci epo'usa:
"'o hpʉhpʉngʉ ne pepe mo mais'a hoci pano cou isi yapneni to ezoyʉ 'omo ʉmnʉ ci tutu.
13:25 nemo seolʉa no acʉhʉ oengʉtʉ,
mo esmi 'o hangʉ,
yapi to tutu no paihicu 'o taico to heome hocu mongoi.
13:26 ac'ʉhʉ ne mohcu yʉʉlʉlʉ ho omcu 'o heome,
cu yaeza honga 'o paihicu.
13:27 mo uhto tauke 'o soskuskunu ho yainca:
""tauke,
o'amos'aeno acʉhʉ ʉmnʉ ci tutu 'o osko yapneni,
'e paihicu mamos'a a'ʉmtʉ i'mi nenu?""
13:28 isi yut'inga:
""'a hi'hioa to hangʉ na eni."" ihecu tuocosi:
""teko poa tum'um'eni a'mi si paihicu?""
13:29 isi yainca:
""o'ate 'ahʉya!
maica hocimu tum'um'i si paihicu,
te sokoeva no tu'upi si heome.
13:30 poan'a yu'upu ta heome si paihicu;
hotena efeuta,
ta'u eutotaveiya 'o te efeutu ci soskuskunu ho auevan'a tum'um'i 'o paihicu,
seo'pʉ'pʉya ho hmoi,
tac'u a'pʉ'pʉya 'o heome,
soteuyuna to fo'fou'u."" "
epo'usa to chae enghova
(maluko 4:30-32; luka 13:18-19)
13:31 isi mi'usni to iesu 'o tesi ho mo'engho tomo h'unasi ci epo'usa:
"'o hpʉhpʉngʉ ne pepe mo mais'a conci tutu no chae enghova,
ihe emʉ'a to ezoyʉ to cou.
13:32 'e tutu eni mo na'nohe 'o'okosi to mocmo ci maututu,
ho micu yʉʉlʉlʉ la meoisihe to mocmo ci chae;
la aʉlʉ yu'e'evi,
ac'ʉhʉ to zomʉ 'ola meelʉ mooyai sku'u to ehtisi."
epo'usa to koa smoof'o
(luka 13:20-21)
13:33 mio mo'engho tomo h'unasi ci epo'usa 'o iesu:
"'o hpʉhpʉngʉ ne pepe mo mais'a 'o smoof'o,
cihi ci mamespingi mo mayo ho siya tomo
13:40 kilo ci tungva,
acʉha poa smoof'o 'o cono taucunu ci tungva."
boemi to epo'usa
(maluko 4:33-34)
13:34 mo boemi to epo'usa 'o iesu ho mi'usnu tamo botngonʉ ho eʉsvʉsvʉta 'e acʉcʉhʉ;
hoci o'tec'o boemi to epo'usa,
o'anaisi mi'usni ho mo'engho no mocmosi.
13:35 ho isi yaica aʉla mia 'o ohela engha to eyongensa ci e'e:
"te'o boemi ta epo'usa ho mi'usni na hin'i ho eʉsvʉsvʉti,
eʉsvʉta hin'i 'omo noototoefʉngʉ ci hi'hioa ne ohon'a teyai 'e hpʉhpʉngʉ."
esansana 'o epo'usa to paihicu
13:36 mo mongoi to botngonʉ 'o iesu,
yʉmeʉmʉ to emoo.
mio i'vaho uso 'o tesi ho tuocosi:
"tekon'a eʉsvʉta a'mi,
zou cuma na e'ausnasi to epo'usa no paihicu?"
13:37 yainca to iesu:
"i'omo miyapo to ʉmnʉ ci tutu.
'ai'oeno okocou;
13:38 'e ezoyʉ 'ai'eeno hpʉhpʉngʉ;
'o ʉmnʉ ci tutu zou 'omo tma'usnu to hpʉhpʉngʉ ne pepe ci cou;
'o paihicu zou 'omo tma'usnu to kokuzo ci cou;
13:39 i'omo miyapo to paihicu ci hangʉ 'ai'oeno 'akuma;
na efeutu 'aeno na puesona ta hpʉhpʉngʉ maitan'e;
'o soskuskunu no efeutu zou tensi.
13:40 ho tac'u noc'ʉhi 'e puesona ta hpʉhpʉngʉ maitan'e,
'ola peiskuzkuzo te mais'a 'o paihicu ho tum'um'i,
to'seni to puzu ho hmoi.
13:41 tesi popeoskuna to okocou 'o tensi,
acʉha tʉtpʉta 'o la koa peiskuisi ho i'o afu'u kokuzo ci cou.
13:42 to'seni to pupuzu.
yonto ic'o ho mongsi ho sihsikiki.
13:43 ho mio,
'o coumoʉlʉlʉ te yonto hpʉhpʉngʉ to amopepe,
te mais'a hie ho psoetiskou.
namo yaa koyua,
acʉhʉ'so tmalʉ!"
epo'usa to nootoefʉngʉ ci 'anonua
13:44 "'o hpʉhpʉngʉ ne pepe mo mais'a nootoefʉngʉ to ezoyʉ ci 'anonua.
pano cou cimo elʉ,
isicu feʉ'sa,
micu na'no kokaekaebʉ ho phieni 'o acʉcʉhʉsi,
usa ho phini 'o ezoyʉ ic'o."
epo'usa no sinzu
13:45 "'o hpʉhpʉngʉ ne pepe mio maezo mais'a cihi cila 'amamhimhino ci cou mo biebimi no sopepea ci sinzu.
13:46 ne isicu elʉa 'o sinzu,
isicu psʉcʉcʉhneni 'o acʉcʉhʉsi,
usa ho phini 'o sinzu ic'o."
epo'usa no tokeʉpʉ
13:47 "'o hpʉhpʉngʉ ne pepe mio maezo mais'a hoci i'o keʉpʉ no yoskʉ isi tokeʉpneni to etʉpʉ,
tolʉ to mav'ov'o ci yoskʉ.
13:48 ne micu ngangcʉngcʉ 'o keʉpʉ,
isicu esifova to leeyayoskʉ,
yusuhngu to aaskiti ho apopaevaza 'o yoskʉ,
epeiya 'omo ʉmnʉ ho siya to kunkunu,
ciha 'omo kuzo.
13:49 'e puesona ta hpʉhpʉngʉ maitan'e tena maezo maica:
te yuyafo 'o tensi,
i'mi to 'ayumona to ʉmnʉ ci cou ho ah'una 'o kuici cou,
13:50 to'seni to pupuzu.
yone'e ho mongsi ho sihsikiki."
faeva ho noana'o
13:51 isi tuocosi to iesu 'o tesi:
"'emo maica ci e'e imu acʉha ta'hongi?"
ihe yut'inga:
"'aimzacu acʉha ta'hongi."
13:52 yainca to iesu:
"hoci mio maica,
'emo macicihi ci lema'cohio seiso te meelʉ tesi to hpʉhpʉngʉ ne pepe,
mais'a hoci i'o tauke to conoemoo,
isi i'mi to fo'fousi ho teoyafa namo faeva ho noana'o ci macucuma."
hopsʉpseni to yane nazalo 'o iesu
(maluko 6:1-6; luka 4:16-30)
13:53 eepʉnga to iesu 'emo maica ci epo'usa,
cu mongoi to ic'o,
13:54 maine'e to iachisi emooana.
mo yonto kaitoo ho mo'ma'cohio to cou;
mo acʉhʉ yamci 'omo tmalʉ,
yainca:
"ma ita elʉa nenu 'emo maica ci hia toutʉs'ʉ ci koyu?
mitan'a peispopo'e!
13:55 na taini o'as'aeno oko to taiku?
'o ino taini o'as'aeno maliya.
'o yakovu,
yosefu,
saimong,
ho i'o yuta o'as'aeno acʉhʉ 'a'ahaesa taini?
13:56 i'o ohaesa nota maamespingi o'alas'aeno acʉhʉ no'upu a'to?
'e acʉcʉhʉ ci tonʉ taini mamos'a i'mi nenu?"
13:57 ihecu hopsʉpseni 'o iesu.
isi mi'usni to iesu ho yainca:
"'o eyongensa homo noyafo ta iachisi emooana la toehunga einva to cou."
13:58 maica ho o'aihe taa'uzva,
o'amo man'i na isi hioa ci po'e homo yonto ic'o.
MATAI 14
mcoi 'o letoonono yohane
(maluko 6:14-29; luka 9:7-9)
14:1 ne mio,
isicu tac'ʉhi to honte helote ne ngalilaya na isi hi'hioa to iesu,
14:2 cu mi'usnu to fafeifeihasi ho yainca:
"'e cou eni ahtuo'te 'o letoonono yohane mo smoevovei,
ko'ko mo yaa tonʉ ho hioa 'emo maica ci po'e."
14:3 mamo maica na i'hahozʉsi,
'o helote moso nomio to silotei ci nia vcongʉ to ohaesasi ci fuili ho tʉtpʉta 'o yohane,
seo'eisi ho poekotva to poo'usna.
14:4 maica ho ohsi siho koica to yohane 'o helote:
"o'ate ʉmnʉ ho ciko skoh'ienga 'o silotei ho vcongʉ."
14:5 isi 'ucia opcoza to helote 'o yohane,
at'inghi mo ngoheʉngeʉ to yatatiskova,
maica ho ihe toehunga yainca zou eyongensa 'o yohane.
14:6 to hiesi no meeyayo 'o helote,
mo yonto tuhcu to isi maeeho'a ho 'otole 'o okono mamespingi to silotei,
isi na'na ʉm'ʉmnʉa to helote.
14:7 isicu mi'usni to helote ho esvʉtʉ:
"'upena hociko m'ene no cuma,
te'o acʉha teomneni suu."
14:8 mo tiou to 'osmuhnua to inosi 'o okono mamespingi,
m'ene ho yainca:
"osnia siya ta ceʉ'fʉ 'o fnguu to letoonono yohane ho faeni a'o!"
14:9 mo na'no ma'ngongoveo 'o honte,
at'inghi micu'so yonto tuhcu to isi eho'a ho esvʉtʉ,
cu moeza yaito e'esi mashʉyʉ ho faeni 'o isi p'enia.
14:10 micu popeosmuhnu to cou 'o helote ho uhto poo'usna,
hiftunga 'o fnguu to yohane,
14:11 siya to ceʉ'fʉ,
ho faeni to okono mamespingi to silotei;
'o oko no mamespingi isicu faeni to inosi.
14:12 ihe usa to tesi to yohane,
ho yaa 'o nia feangosi ho soʉlʉlʉa,
ataveia eʉsvʉta to iesu 'e hi'hioa eni.
poa yoseʉ to iesu 'omo posiyoemohʉ ci cou
(maluko 6:30-44; luka 9:10-17; yohane 6:1-14)
14:13 isi tac'ʉhi to iesu na eni,
cu yonto 'apangʉ ho mongoi to ic'o,
cihcihi ho uhto mo no'caciku ci hpʉhpʉngʉ.
ihe cohivi to botngonʉ,
i'mi to mahohosa coeconʉ ho to'ofeihni to iesu.
14:14 ne micu tmo'poyapo to aaskiti 'o iesu,
aiti 'emo maica botngonʉ ci cou,
mo aot'ou 'o himcocoveoi ci 'tohʉngʉ,
cu aotothoma 'o tma'congohe.
14:15 ne micu a'usnu no 'eopsi,
mo uhto iesu 'o tesi ho yainca:
"micu yofna,
aavaho no'caciku 'e hpʉhpʉngʉ tan'e,
mate poa aemo'ʉ 'e botngonʉ,
poa iachi uhta mo cum'u ci you ho mhino note ana."
14:16 yut'inga to iesu:
"o'ate 'ahʉya poa aemo'ʉa;
'atemueno poa bonʉa."
14:17 yainca to tesi:
"moc'o eimo ci pang ho yuso ci yoskʉ 'emo yontan'e."
14:18 isi yainca to iesu:
"yaa ho faeni a'o."
14:19 isicu eutotaveiya 'o botngonʉ ho poa suspoyʉ to kukuzo,
ataveisi isi yaa 'o eimo ci pang ho i'omo yuso ci yoskʉ,
mi'usnu ne pepe,
to'aveoveoyʉ to hamo,
tipcia 'o pang,
faeni to tesi,
ihecu i'vaha aangaeza to tesi ho faeni to botngonʉ.
14:20 mo acʉhʉ bonʉ,
a'vinano acʉhʉ yoseʉ.
ihe a'pʉ'pʉya to tesi 'o auz'oz'osi,
aʉla teongcʉngci 'omo maskʉ ueso ci skayʉ.
14:21 'o hia botngonʉ to mo bonʉ,
hoci tapeoha 'o maamespingi ho i'o 'o'oko,
mo asonʉ posiyoemohʉ.
coeconʉ to chumu 'o iesu
(maluko 6:45-52; yohane 6:15-21)
14:22 ataveisi tan'e,
isi popeocucufna to iesu 'o tesi ho poa bohsifou to 'apangʉ,
aueva poa uhto apihana,
isi totea no poa aemo'ʉn'a 'o botngonʉ.
14:23 ataveisi ne micu aemo'ʉ 'o botngonʉ,
mo cihcihi uhto hcuyu 'o iesu ho 'inoli;
ac'ʉhʉ ne micu yofna mion'a nongaco to ic'o.
14:24 tuhcusi ne mio,
micu na'no nomcovhi to aaskiti 'o 'apangʉ,
mo yupteilʉ tomo meatasufku ci poepe,
mo smoteo'tu'u to taico to smahu.
14:25 ne tec'u mon'i tiskova,
mo coeconʉ to etʉpʉ 'o iesu ho emo'usnu to tesi.
14:26 ihe aiti to tesi homo coeconʉ to etʉpʉ,
mo kuici yamci,
yainca:
"zou hicu!" mo acʉhʉ mukeici to hiahe smoyo.
14:27 isi osnia mi'usni to iesu 'o tesi ho yainca:
"'a a'o,
teav'a smoyoa!"
14:28 yainca to petelo:
"nooe'oca,
hoci zou suu,
nahoeno poa coeconʉ ta chumu a'o ho uhta iko yoni!"
14:29 yainca to iesu:
"uhtan'e!" micu ohpueho to 'apangʉ 'o petelo,
mito chumu ho emo'usnu to iesu.
14:30 at'inghi ne isicu aiti 'o poepe homo meimacongo,
mo ngoheʉngeʉ 'o 'tohʉngʉsi,
cu ahoi sʉhcʉ'o,
micu moozoyʉ:
"nooe'oca,
to'usni a'o!"
14:31 isi osnia ho'usneni to iesu 'o emucusi ho tʉtpʉta,
yainca:
"mo angu okosi co singkoosu.
mainci ma'pepecvai?"
14:32 ne micu bohsifou to 'apangʉ,
cu tosvo 'o poepe.
14:33 'o tesi cimo yonto 'apangʉ mo acʉhʉ pop'up'ungu ho m'ohkuyu to iesu,
yainca:
"zou'sio a'ʉmtʉ oko to hamo suu."
poa yov'o 'omo tma'congo ne konisalo
(maluko 6:53-56)
14:34 ne micu ohpihi to etʉpʉ,
mo tmo'poyapo to konisalo.
14:35 ne ihecu honga to cou ne'e ho zou i'o iesu.
cu popeosmuhnu to cou ho yuyafo,
to mia'usnu to cum'usi ihe acʉha hafa uhto tuhcu to iesu 'omo tma'congo ci cou.
14:36 mo mi'usnu to iesu ho m'eya makoc'o aaso to pepuehonʉ to yʉsʉsi;
'omo afu'u meuaso ci cou cu acʉhʉ yov'o.
MATAI 15
h'oceona no nia maameoi
(maluko 7:1-23)
15:1 piyo ci coufalisai ho lema'cohio seiso mo i'mi ne 'elusalemu ho baito to iesu,
tuocosi 'o iesu:
15:2 "mo mainci o'te noʉt'ʉci to tesisu 'o h'oceona to nia maameoito?
ta auyusi hote bonʉ ma'i mo maito h'oesvʉta ho yoemucun'a!"
15:3 yut'inga to iesu:
"mainci mimu nomio no noʉt'ʉcʉ no nia h'oceona,
ho yuf'uha 'o lasi pashʉya to hamo?
15:4 isi yainca to hamo:
""la meot'ʉt'ʉcʉ to maameoi"";
yaeza yainca:
""inala matkuzkuzo no maameoi,
te asansana opcoza.""
15:5 namalamu yainca,
hoci panonte mi'usnu no maameoi ho yainca:
""i'o nto'u titha aʉt'ʉcʉ muu os'ocu acʉha faeni to hamo"",
15:6 o'ana tesi 'ahʉya aʉt'ʉca na maameoisi.
mimu titho to nia h'oceoceona ho peʉezeni to e'e to hamo.
15:7 'e me'ʉ'ʉmnʉ ci cou,
'o ohsila pas'usna muu to 'izaya ho eyoca ci e'e a'ʉmtʉs'a etuhcu! isi yainca:
yainca to hamo:
15:8 'e yatatiskova lac'o boemi ta sumsu ho einu a'o,
'o 'tohʉngʉhe mo emomcovhi a'o.
15:9 lahe ta'unano zou mashʉyʉ'u 'o h'oesvʉta ta cou;
'o lahe hia m'ohkuyu a'o.
moc'o acʉhʉ 'afeungu!"
'ola koa ca'i ta cou ci macucuma
(maluko 7:14-23)
15:10 isi eteuyuna to tuhcusi to iesu 'o botngonʉ ci cou,
mi'usni ho yainca:
"temu tmalʉ,
la yaeza ta'hongi!
15:11 i'ola mito ngayo ta cou ho yʉmeʉmʉ ci macucuma o'ate koa ca'i ta cou;
'ai'olaeno i'mi ta ngayo ta cou ho yuyafo nate meelʉ koa ca'i ta cou."
15:12 ataveisi 'o tesi to iesu ihe eʉsvʉta:
"osko cohivi?
ne ihe talʉi to coufalisai 'o e'esu,
mo na'no tmakvo'ʉ?"
15:13 yut'inga to iesu:
"na afu'u o'aisi emʉ'a to amo'u pepe ci cacʉfea te acʉha tuefisi.
15:14 teav'a 'ahʉya cumasa hin'i!
mihin'i bʉkngʉ ci leeahafo;
hoci eahafa no bʉkngʉ na bʉkngʉ,
'ate ahtuo'te aepohʉ su'ayumonʉ no feongo."
15:15 yainca to petelo:
"tekon'a esansana a'mi na e'ausnasi ta epo'usa tan'e."
15:16 yainca to iesu:
"mimun'asi ac'ʉhʉ maitan'e ho totiski si mocmo ho o'te tma'hongʉ?
15:17 o'aimueno cohivi,
i'ola afu'u mita ngayo ho yʉmeʉmʉ ci macucuma,
ho micu yonta cfu'o,
'atenac'ueno te'eafa?
15:18 at'inghi 'ola i'mi ta ngayo ho yuyafo mo i'mi no 'tohʉngʉ,
'ainamoeno maica nate koa ca'i ta cou.
15:19 maica 'omo i'mi to 'to'tohʉngʉ ta cou ho yuyafo la yaa mav'ov'o ci kuici koyu;
'emo maica ci kuici koyu lasi poa peis'usnu no opcoi,
smoc'ou,
yup'ouso,
meo'eoi,
meknuyu,
eayaezoyʉ ci kuisi.
15:20 acʉcʉhʉ 'emo maica te a'ʉmtʉ koa 'oha cofkoya ta cou.
inacu o'te yoemucu hote bonʉ o'ate koa ca'i ta mocmo ci cou."
singkoo tamo cihi ci mamespingi
(maluko 7:24-30)
15:21 mo mongoi to ic'o 'o iesu,
totoefʉngʉ ho uhto mia'usnu ne tailo ho saitong.
15:22 mo cihi ci mamespingi to kanan mo baito to iesu,
moozoyʉ mainca:
"nooe'oca,
oko to tavite,
coveoza a'o!
isi ti'eopi to hicu 'o okono'u mamespingi,
mo na'no 'atutumio."
15:23 o'amo matnʉskʉ yut'ingi 'o iesu.
mo uso 'o tesi ho yainca:
"tekon'a poa mongoi si mamespingi!
mo to'ofeihni a'to ho apaezumo moozoyʉ!"
15:24 yut'inga to iesu:
"ho mi'o noa popeoskuna te'oc'o i'ima 'o mo eapayo'ʉ ci moatʉ'nʉ ta cou'isolaelu."
15:25 ne isi talʉi to mamespingi 'e e'e eni,
cu pop'up'ungu to tuhcu to t'ango to iesu,
yainca:
"nooe'oca,
to'usni a'o!"
15:26 yainca to iesu:
"hoci mayo no 'oanʉ no 'o'oko ho to'seni no tuutu o'ate emio."
15:27 yainca to mamespingi:
"'aeno a'ʉmtʉ,
nooe'oca,
at'inghi 'o tuutu 'alaeno maezo bonʉ tola i'mi to pangka to tauke ho supeopeohʉ ci pu'pucu!"
15:28 isicu yainca to iesu:
"mamespingi,
a'ʉmtʉ meoisi co singkoosu,
tee maita osko p'enia ho teomneni!" 'o okonosi mamespingi micu yov'o to tuhcusi ne mio.
aotothoma 'o mav'ov'o ci tma'congo to cou
15:29 mongoi to ic'o 'o iesu,
esmi to aaskiti to etʉpʉ ne ngalilaya.
mo bohsifou to hcuyu,
hocu yusuhngu.
15:30 ihe ivaha i'ima to botngonʉ ci cou,
a'vinano hafa uso 'omo pi'o,
bʉkngʉ,
kealeilea,
tmusngʉsngʉ,
ho i'o mo yaa mav'ov'o ci tma'congo ci cou,
acʉha siya to yaa t'ango to iesu;
isicu macicihi poa yov'o to iesu.
15:31 i'emo botngonʉ ihe aiti homo aomotʉ'ʉ 'o tmusngʉsngʉ,
yov'o 'o kealeilea,
coeconʉ 'omo pi'o,
teolʉ 'omo bʉkngʉ,
acʉhʉ na'no yamci,
maezo acʉhʉ tohmomoengʉ to hamo to 'isolaelu.
poa yoseʉ to iesu 'omo posisospotʉ ci cou
(maluko 8:1-10)
15:32 isi eyoho'a to iesu 'o tesi,
mi'usni ho yainca:
"os'o na'na ta'cingha 'emo botngonʉ ci cou,
micu miteuhi homo no'upu a'o,
uk'a ci tehe maka peelʉi ana.
o'a os'o ʉmnʉa hoci sieo ho maine'e,
saho'oa tes'a e'puyu ne ceonʉ."
15:33 yainca to tesi:
"yonta mo maica hia no'caciku ci hpʉhpʉngʉ,
ma temza'so uhnenu ho biebimi nontehe omsoa tamo maica ci hia botngonʉ ci cou?"
15:34 isi tuocosi to iesu:
"mo piyo na pangmu?"
ihe yut'inga:
"mo pitu ci pang ho piyo ci 'o'oko no yoskʉ."
15:35 isicu cucufni to iesu 'omo botngonʉ ho poa yusuhngu to ceoa,
15:36 yaa 'omo pitu ci pang ho piyo ci 'o'oko no yoskʉ,
to'aveoveoyʉ to hamo,
tipcia,
faeni to tesi;
'o tesi ihecu ivaha aangaezeni tomo botngonʉ.
15:37 mo acʉhʉ bonʉ,
a'vinano ooyoseʉ.
ihe a'pʉ'pʉya to tesi 'o 'pu'pucu no ong'ongacvʉ,
teongcʉngci 'omo pitu ci skayʉ.
15:38 'omo yoseʉ,
hoci tapeoha 'o maamespingi ho 'o'oko,
mo posisospotʉ.
15:39 isicu poa apeaski to iesu 'o botngonʉ,
atavei bohsifou to 'apangʉ,
emo'usnu to mia'usnu ne makatan.
MATAI 16
m'eya baito no po'e
(maluko 8:11-13; luka 12:54-56)